- Ruata
Maruti Suzuki Grand Vitara chhuak mek chu an tihchhuah atangin kum 1 a tling veleh ta a. He lirthei hi nuai 1 lai mai an hralhchhuak tawh a midsize SUV huangah nuai 1 an hralh ran ber lirthei a ni.
India ramah hian SUV hi lirthei leituten an bawh nasa em em mai a. Tunah pawh hian compact/sub 4 meter SUV atanga Vitara te awmna midsize SUV huanga lirthei te hi India rama lirthei hralh tam ber te zinga mi a ni a. Mizoramah ngei pawh lirthei thar lei zingah SUV huanga mi lirthei lei hi an tam hle a ni.
A khan san deuh vang te, ram leilung nena a inmil vang leh a design bakah kawng hrang hrang avanga heng lirthei te hi hralh tam a ni a tih theih a. Car te chi, to ve tak ai chuan a man inang leh intluk deuh thuaka SUV huanga mi lirthei lei ta zawk hi an tam hle a, heng zingah hian Grand Vitara pawh hi a tel a. Mizoramah ngei pawh he lirthei hi kan hmu tam ta viau a ni.
Maruti Suzuki Grand Vitara hi tun dinhmunah a huang awmna midsize SUV huangah lirthei hralh hnem ber dawttu a ni mek a. Pakhatna dinhmun hi chu Hyundai Creta hian a luah deuh reng thung a ni. Heng lirthei pahnih hi Mizoramah ngei pawh a tam ta viau a, he huanga lirtheiah chuan kan hmuh tam pawl tak a ni a. Dealership pawh mumal tak ve ve an nih avangin leitute an hip viau a tih theih awm e. He lirthei pahnih bakah hian he huanga hralh kal leh deuh chu Kia Seltos hi a ni bawk a, hei pawh hi a pung chho viau a ni.
- Maruti Suzuki Grand Vitara
Maruti Suzuki Grand Vitara chhuak mek hi Toyota nena tangkawpa duan a ni tih chu kan hre tlang theuh ang a. Hetiang design leh engkim deuhthaw inang hian Toyota chuan Hyryder an hralhchhuak ve thung a. Grand Vitara hi Bidadi-a Toyota manufacturing plant-ah siamchhuah hna pawh thawh mek a ni.
Grand Vitara hi khawl leh gearbox duhthlan tur hrang hrang nen tihchhuah mek a ni a, front wheel drive leh all wheel drive version duhthlan tur a awm bawk a. CNG hmang pawh awmin CNG kg 1 in km 26.6 a tlan thei a ni.
Maruti Grand Vitara Suzuki Global C platform nghahchhana duan niin he platform hi Toyota Hyryder leh Maruti Brezza te pawhin an hmang mek a. 1.5-litre, 4-cylinder K15C smart hybrid petrol leh 1.5-litre, 3-cylinder Atkinson Cycle TNGA petrol khawl te duhthlan tur a awm a. Mild hybrid setup hian 103bhp power leh 136Nm torque a pechhuak thei a, 5-speed manual leh 6-speed torque converter automatic gearbox te duhthlan tur a awm a. Hetah bik hian Suzuki AllGrip All Wheel Drive system duhthlan theihin a awm bawk a ni.
Strong hybrid khawl lam thung chuan 92bhp power leh 122Nm torque a pechhuak thei thung a. He khawl hi electric khawl AC synchronous motor 79bhp power leh 141Nm torque pechhuak thei nen thlunzawm a ni bawk a. Heng khawl pahnih tangrual hian 115bhp power pechhuak thei anga chhut a ni thung a ni. 6-speed e-CVT gearbox a hmang a, hmanraw changkang colored Head-Up Display, 360-degree parking camera system, ventilated seats leh adangte he SUV ah hian kan hmu bawk a ni.
Shashank Srivastava, Senior Executive Officer, Marketing & Sales, Maruti Suzuki India Limited chuan Maruti Suzuki chuan kum 40 chuang mah India ramah lirthei hralhchhuah tam lamah hma a hruai tawh tih a sawi a. Nikuma Grand Vitara an tichhuak thar leh chuan ramchhunga SUV ngainatute lawm a hlawh hle tih sawiin hei hian Maruti Suzuki in SUV an hralhchhuah kawngah pawh nasa takin a pui hle a ni a ti.