Mexico hmar lama biak in chung chim avangin mi 10 vel an thi niin tual chhung thuneituten an sawi.
Tamaulipas state-a tuipui kam khawpui, Ciudad Madero-a Santa Cruz biak in chim avang hian mi 49 lai damdawi inah hruai an ni bawk.
Thi zingah hian naupang pahnih an tel bawk nia sawi a ni.
Police chuan a chim lai hian inkhawm 100 vel an tel niin an sawi a. Thenkhat chuan mi baptisma chantir lai niin an sawi bawk.
A chung a chim hnuah hian mi eng emaw zat an tang a. Social media-a thlalak leh video darhah chuan biak in chim bulah hian mi tam tak pung khawmin an chin hriat lohte an an zawng hlawm tih a lang.
Tamaulipas Governor Américo Villarreal chuan a hnuah chin hriat lohte chu hmuh kim an ni tawh tih a sawi niin Agence France-Presse (AFP) news agency chuan a tar lang.
Tual chhung chanchinbu mi pakhat, Franc Contreras chuan BBC World Service-a Newsday programme-ah a chim lai tak hi inkhawm urhsun lai tak a nih thu a hrilh.
“A chhungah mi 100 chuang an awm a, Catholic Mass lai niinmipuite chu a urhsun lai ber hmangin an intlar a. Leirawhchan, concrete leh a dawlna steel zawng zawng nen an chungah a tla ta rup a ni,” a ti.
Red Cross thuneitute chuan in chung hi a chhim zum sang lang chhuatah a tla a, a awl a awm theih hlauh avangin a hnuaia awmte tan pawh dam theihna a awm phah niin an sawi.
A hmun thleng hmasaten suahdur leh lei laihna hmanrua nen a hnawkte chu an hai nghal a ni.
Pathianni chawhnua biak in a chim hnu rei vak lova thlalak darh lehah erawh emergency services mite an thleng tawh thung.
Social media-ah hian damdawi leh chhanchhuahna hmanrua mamawhna a san thu nasa taka tihdarh a ni bawk.
Thuneitute chuan a bul hnaia awmte chu thawm bengchheng chhuah lo turin an ngen a, hei hi chim kara tangte thawm an hriat theih nana an tih a ni.