Nottingham Forest in tlem zawk an nih hnuah goal chhuah mahse an sut thei a, Brentford nen 1-1 in an inhnehtawk.
Pathianni zana Premier League inkhel awmchhunah The City Ground-ah Brentford an mikhual a. First half-ah team pahnihten hlauhawm siam tam lo mahse second half inkhel erawh a danglam hle.
Moussa Niakhate chu Yoane Wissa a rah avangin yellow card pek nawn a ni a, hnawhchhuah a nih hnu lawkah a freekick chawi atangin Brentford captain Christian Norgaard chuan goal a khung a. Mathias Jensen ball vawrh luh atangin a tauh lut.
Mahse Brentford hian minute sarih bak hma an hruai lo. Argentina midfielder Nicolas Dominguez chuan Bologna atanga a zawm hnuah a club thar tana a goal hmasa ber a tauh lut.
Brentford substitute Neal Maupay chuan huntawp dawnah chakna goal a khung teuh a. Mahse league inkhel match nga chhungin chak hmel hmu tawh lovin an awm mek.
Nottingham Forest boss Steve Cooper chuan, “Second half kan tan that loh kan tuar a, tihsual kan ngah hle. Khata tang khan goal kan chhuah. A hnuah erawh tlem zawk chungin kan bei let thei a, Brentford aiin kan point khat hi a hlu zawk ang.” tiin a sawi.