Maharashtra-a Yavatmal district chhungah ngaihthah vang liau liauvin naupang 12 chu an kaah zeng hri danna aiah sanitiser farsak an nih thu thuneituten an sawi.
Naupangte hi kum nga hnuai lam vek niin sorkar damdawi inah dah nghal an ni a, an dinhmun erawh a ngaihtuahawm a ni lo.
He thil thleng vang hian hri danna semtu zinga pathum chuan an thil tihsual rah an seng ngei dawn nia tar lan a ni bawk.
Pathianni khan he thil thlen dan hi tar lan a ni a. Thingtlanga Primary Healthcare Centre-a National Pulse Polio hnuaia hri danna kum 1-5 inkarte tana sem chhuahnaah a ni.
Shrikrishna Panchal CEO, Yavatmal Zilla chuan naupang 12, kum nga hnuai lamte chu zeng hri danna aia sanitiser pek an nih thu hi a puang a. An zinga naupang pakhat phei chuan luak leh awm nawm lohna hrang hrang a nei niin a sawi.
Tar lan danin doctor, anganwadi hnathawk leh ASHA hnuaia volunteer pakhatte chu he thil thlen lai hian an duty a. “Chhui zui mek a ni a, heng mi pathumte suspend tur hian lehkha pawh a kal mek,” tiin Panchal hian a sawi.
He thil thlen hnu hian nu leh pa thenkhatte chuan an hlauhthawn bakah thil tisualtute pawh mawhphurhna la ngam turin an duh nia tar lan a ni.