Aizawl: Aizawl South I bialtu MLA C Lalsawivunga chuan pathian leh mipui zarah ZPM an sorkar chuan old age pension atan budget atangin Rs 1,000-in an tipung dawn niin a sawi.
Nimina Bethlehem leh Bethlehem Vengthlangah Upa Pawl Ni a hmanpuinaah C Lalsawivunga chuan Zoram dung leh vangah ruihhlo avanga buaina a tam ang bawkin, ngaihthlak hrehawm khawpin chanchintharah leh social media ah te eirukna thu leh hla hmuh tur a tam thin hle a. He’ng zawng zawngte hi chhungkua atanga sei liante atanga chhuak a nih avangin nu leh pa, pi leh pu te chu an tu leh fate tana khawtlang leh ram siamthatna kawngah kristian chhungkua atanga siam thaa, bul tan thar leh turin a chah.
C Lalsawivunga chuan sorkar laipuiin kum lama upa te a ngai pawimawh hle a, chhawmdawl nan pawh old age pension scheme a kalpui tih sawiin, “Kan state sorkar pawhin Rs 50-100 velin a lo puibawm a. A beitham hle a ni. Chu pawh a hun takah kan dawng thei thin lo,” tih sawiin, pathian leh mupuite zarah ZPM a sorkar a nih chuan old age pension hi budget atangin Rs 1000 in a tipung dawn niin a sawi.
Bialtu MLA hian Bethlehem veng Upa pawl tan combo sound system leh microphone thar a pe a. Bethlehem vengthlangah hian upa pawl house sak nan a MLA fund atangin Rs 3,00,000 a pe tawh bawk.