Indopui I-na hun lai daih tawha German hand grenade la thi lo chu Hongkong-a kamram siamna hmun, crisp factory-a siam tura France atanga thawn luh zingah a lo tel a, pawi a khawih hmain police-in an sut hman hlauh thung.
He grenade hi Inrinni khan lawng atanga an phurh luhna hmun, Calbee snacks factory-ah hmuh chhuah a ni a. “Grenade hi a him lo hle a; mahse, a lo puak lo hlauh a ni,” tiin superintendent Wilfred Wong Ho-hon chuan a sawi.
Police-in a hmunah hian an sut a, Wong chuan police bomb disposal officer-ten factory-in tui an luan chhuahtirna hmunah kengin an tipuak tih a sawi.
Grenade hi cm 8-a lian, kilogram 1 laia rit a ni a, “France atanga alu nena lak luhnaa lo tel a ni,” tiin Wong chuan a sawi.
Indopui I-na hun laiin trench-ah hnutchhiah palh a nih an ring ber a, a hmunah hian alu an ching zui ang a, a chingtuten an seng tel palh a nih rin ber a ni a. Hong Kong University military historian Dave Macri chuan, “Chirhin a lo khuh a nih chuan sipaiin a kalsan palh ang a, a nih loh pawhin an vawm tawh, puak lo a ni ang,” a ti.
Hong Kong police-te hian tuna an thil tawn ang, indo ralthuam hlui hi an lo tawng fo tawh a. A bikin Indopui II-na hun laia Japanese-in an khawpui an run laia US-in bomb an thlak, tun hnaia hmuh chhuah chauh a la awm zeuh zeuh a ni.
Nikum pawh khan bomb disposal squad chuan Indopui II-na hun laia mi bomb lian tham tak tak pathum, pahnih chu Wanchai district-a hmun lun lai tak, metro railway station thar an sak meknaah an hmu chhuak tawh a ni.
Chinese khawpui chhim lamah pawhindo hun laia bomb leh grenade puak ta lo hi hiker leh construction worker-te hian an hmu thei hle bawk a. Helai vel hi Japanese leh British tangrual sipaite kum 1941-a nasa taka an inbeihna hmun a ni a. Hetih hun laia British colony hi Japan sipaiten an lak hnuah US leh a tanrualpuiten nasa takin an bomb a ni.