Aizawl: Palak bial atanga Congress ticket-a thlan tlin, KT Rokhaw chuan nimin khan MLA a nihna atanga bânna a theh lut a, Congress member a nihna pawh a bânsan a; MNF-in sorkarna an siam chhunzawm a rin thu a sawi.
KT Rokhaw chuan Assembly Speaker Lalrinliana Sailo hnenah bânna a theh lut a, speaker chuan a bânna hi a lo pawmsak nghal a ni.
Bânna a theh luh zawha chanchinbu miten an kawmnaah Rokhaw chuan Congress bânsana MNF a zawm chhan sawifiahin, MNF party hruaituten MNF ticket-a a bial ngaia ding turin an sawm a, a bial mipuite a rawn hnuah thutlukna a siam ta tih a sawi.
Rokhaw chuan, “MNF hruaituten min sawm lai khan ka bial mipuite rawn phawt ka duh thu ka sawi a, ka bial chu ka fang chhuak vek a, Congress unit hruaitute, MNF unit hruaitute ka rawn a, bial chhung khaw hrang hranga nu leh paa ka lo neih tawhte ka rawn bawk a, MNF-a luh chu kan thutlukna a ni ta a ni,” a ti.
MLA atan tum thum thlan tlin a lo ni tawh thu a sawi a, a bial mipuiten eptu MLA neih chu an hreh tawh a, ruling-a awm an thlahlel tawh lutuk tih sawiin, sorkar leh mai tur zawm chu a tih makmawh nia a hriat thu a sawi bawk.
Rokhaw chuan MNF party-in sorkarna an siam leh ngei a rin thu sawiin, Mizorama sorkarna lo siam tawhte thlirin party mala sorkarna an siam chuan kum 10 chhung sorkarna an chang ngei thin a, chutiangin MNF pawh kum ngana an hmang zo a, kum 10 rorel turin term hnihna an chhunzawm chu Mizo mipuite thlir dan a nih thu a sawi bawk a ni.