Aizawl: Mizo Zirlai Pawl (MZP) hruaitu tharte leh hruaitu kal chhuak turte chu nimin khan charge an inhlan a. MZP President thar H Lalthianghlima chuan tun hnaia ram rorelna sang, assembly house-ah hnam dang kawppui nei hmeichhiaten thut tuma hma an la chu pawi a tih thu a sawi.
MZP General Headquarters Pisapui-a charge inhlanna inkhawmah H Lalthianghlima chuan ram leh hnam, zirlaite tana tha turah chuan huai takin an kal dawn a. Chumi kawngah thurawn eng pawh an dawnsawn theih tur thu a sawi.
Mizo hmeichhiaten hnam dang pasal an neih chu tha an tih loh thu nasa takin an tlangaupui thin tih sawiin MZP president chuan, “Chutianga hnam dang kawppui neiten tun hnaiah ram rorelna sangah thut tumin hma an la hi pawi kan ti a, kan ram leh hnam him nan theihtawpin kan dodal dawn a. Hnam dang kawppui neite pawhin Mizo hnam hmangaih avangin ram rorelna sang berah hmun chan tum kher lo turin kan ngen a ni,” a ti.
Mi thenkhatin hnam aiawh an ni tih pawh an hriat lohten hnam aiawh ang maia hmun hrang hrangah thu an sawi thin chu pawi an tih thu sawiin H Lalthianghlima chuan, “Ram leh hnam thil kan sawi dawn a nih pawhin, fimkhur tlang turin mi tin kan duh a ni,” a ti.
H Lalthianghlima chuan Mizo thalaiten All India Service leh Central Service-a tling an tlem em em chhan chu kum tin state service lak a nih thin vang a ni pakhat a. Kum tina state service (MCS) lak thin chu khât deuh zawk emaw, tum khatah tlem tetein emaw la turin Mizoram sorkar an ngen tih a sawi bawk.