Azl: Mizoram University-a Psychology department-in nimina Ruby Jubilee lawmna hun an buatsaihah Larsap Dr Hari Babu Kambhampati chuan khuallian niin a hman pui.
Thusawiin Dr Hari Babu Kambhampati chuan, tunlai khawvel hmasawn zelah mipui rilru sukthlek dan te a hrisel zawnga kaihruai kawngah leh rilru lama harsatna nei te enkawl kawngah Psychology pawimawh zia an hre chho mek tih a sawi a. Taksa hriselna a pawimawh tluk chiahin rilru lama hrisel a pawimawh tih a sawi.
Larsap chuan, MZU Psychology department-in Clinical Psychology zirtir phalna thuneitu sang hnen atanga an hmu chu a lawmpui tih a sawi a. Clinical Psychology zirtirna kalpui a nih hnu hian Psychology department chuan khawtlang nun leh inkaihruaina kawngah chak zawkin tha an rawn thawh theih a beisei thu a sawi bawk.
MZU Auditorium-a inkhawmah khualzahawm, MZU Vice Chancellor, Prof Dibakar Chandra Deka pawhin thu a sawi.