MPCC President Lalsawta’n nimin khan Aizawl Press Club-ah thu thar thehdarhtute a kawm a, sakhaw zalenna nuai bo tumtuah BJP chu puhin, inthlanpui lo awm turah hnawl turin mipui a chah.
India ram a zalen atanga vawiin thlenga BJP vanga hun khirh leh thim ramin a hmachhawn hun a la awm ngai lo tih sawiin Lalsawta chuan, “BJP hian sakhaw tihbik neiin sakhaw dang vuantute min nekchep chho mek zel a. Term hnih an sorkar tawh hnu hian term khat dang han sorkar leh ngat phei se chuan, India ram hi kan chhe darh vek ang tih kan hlau a ni,” a ti.
Lalsawta chuan kum tam tak sakhaw zalenna vanga missionary-ten harsatna tawk lutuk lova an awm theih thin chu, tunah chuan an chep ta hle tih sawiin, “Foreign Contribution (Regulation) Act hnuaia ram dang atanga tanpuina dawng thin te pawhin harsatna namen lo an tawk ta a ni,” a ti.
BJP hian MP an ngah avangin dan (law) hlauhawm tak tak – Citizenship (Amendment) Act, 2019 leh Forests (Conservation) (Amendment) Act, 2023 an siam tawh a. Tunah hian Mizo hnam nun leh sakhua inzawm tlatna nuai bo turin Uniform Civil Code (UCC) chu pass leh an la tum mek niin a sawi.
Congress president chuan BJP sorkar hmalakna chu India ram tan a hlauhawm tih hriain, political party 26 chu intelkhawmin I.N.D.I.A (alliance) an din a, I.N.D.I.A hian vote vbc. 65 an nei tling a, BJP hian vote vbc. 23 chauh an nei a. Party intelkhawmte hian central-ah sorkarna an chang ngei dawnin a hriat thu sawiin, “Mizorama Congress party-in sorkarna kan neih chuan MP pawh kan thawh ve theih dawn a. Sakhaw zalenna kan neih zui zel theih nan leh heng dan hlauhawmte sut vek thei tur Congress party hi India ramah kan sorkar a ngai a ni,” a ti.
“ZPM chuan Congress party angin I.N.D.I.A hi an thawhpui thei lo va; BJP erawh chu MNF ang bawkin inthlahrung tak leh Mizoram mipui mitmei veng chunga an thawhpui thei mahna,” tia sawiin Lalsawta chuan Mizoram, hnam leh sakhua humhim turin Mizoram mipuite hian BJP thawhpui ngai lo tur Congress party an thlan tlin a tul tih a sawi.
Congress an sorkar chuan sorkar hnathawkte tan Old Pension Scheme-a let leh vek an tum tih sawiin Lalsawta chuan, “Old Pension Scheme hian that tawk lohna leh sorkar sum a heh tih hre mah ila, sorkar hnathawkte hi kan duhsak a ni. A tul chuan Mizoram hian Mizoram Pension Rules pawh an siam a ngai mai thei a ni,” a ti bawk.