Mizoram sorkar hnuaia hnathawk, New Pension Scheme (NPS) hnuaia awm mi thahnem takte chuan Old Pension Scheme hman ve phutin nimin khan chief minister pisa bulah an pungkhawm a, chief minster-in Pension Rules ruahman tur study team din a tiam.
Old Pension Scheme hman ve duhtute hi nimin chawhma dar 11 vel khan chief minister pisa bul, Mizoram State Museum kawtah an pungkhawm tan a, thu an hmuh angin Mizoram Movement for Old pension Scheme (MIMOPS) hruaitute leh Chief Minister Zoramthanga chu an indawr chhunzawm.
MIMOPS hruaituten an sawi danin he an inbiaknaah hian chief minister chuan NPS hnuaia awmten pension scheme tha zawk an neih theihna turin pension rules neih a tul nia an hriat thu leh hemi lo buaipui turin study team din a nih tur thu te, he team-ah hian sorkar hotute bakah MIMOPS hruaitute chu member an nih tur thu te, team report chu thla ruk hnuah sorkarah theh luh nei thei se an tih thu leh hemi chungchang notification hi tihchhuah vat a nih tur thu a lo hrilh a ni.
Chief minister bangla bula punkhawmnaah hian buaina a awm lo a, pungkhawmte hian Mizoramah pension scheme pakhat, OPS chiah awm tura an duh thu te, old pension scheme hman ve an duh thute an au chhuahpui a, darkar khat vel an punkhawm hnu chhun dar 12 velah harsatna awm loin an tin darh ta a ni.