India-a pawisa lam chhuitute chuan ei rua puhna chungchangah eptu MP chenna in an dap.
Delhi-a rorel lai, Aam Aadmi Party (AAP) MP Sanjay Singh-a hi sorkar laipui hnuaia awm agency-in party hruaitu thu an zawh fiah thar ber a ni leh ta a ni.
Thuneitute chuan tun hnaia dan hlih tak, zu zawrh kalpui dan (liquor sale policy) chungchangah thu an zawh fiah tih an sawi.
Delhi Deputy Chief Minister Manish Sisodia-a pawh he thubuaiah tho hian kumin February khan man a lo ni tawh.
AAP chuan heng an puhna hi nasa takin an pha a, sorkar laipuia rorelna fawng chelhtu, BJP-in ‘politics bawlhhlawh’ an khelhna hmanrua niin an sawi.
AAP hi kum 10 chuang hret liam taa ei rukna dova kala politics khel zui ta an nih avangin an party leh an hruaitute laka sum leh pai tihfel tawk lohna thubuai awm thin hi an a pawiin a hmingchhiatthlak zual thin.
An party chuan BJP hian anmahni eptu zingah a hmahruaitu ni thei tur bera an dah avangin an lakah hetiang thubuai hi an siam niin an puh bawk.
Enforcement Directorate (ED)-a thawkte hi Nilaini hma takah khan Singh-a inah hian kalin thu an zawt fiah niin PTI news agency chuan a tar lang.
Thuneitute hian an thubuai chhui laiah hian AAP hruaitu dangte in pawh an dap niin an sawi.
He thil hi nikum August thla khan sorkar laipui hnuaia thil chhuitu, CBI-in Delhi sorkar hian he policy tharah hian thamna lain an duhsak zawngte an tihamtha nia an sawi atangin chhui tan a ni a. Tunah chuan he scheme hi hman a ni tawh lo nghe nghe.
CBI-in an chhuina atang hian ED chuan sum tihchingpen khapna dan hmangin thubuai a siam a. February khan CBI-in deputy chief minister hlui ni ta, Sisodia chu an man zui ta a, engmah tihsual a nei lo niin insawi mah se tun thlengin lung inah a la awm.
Singh-a chuan Nilainia a in an dap leh thu an zawh fiah chungchang hi sawi a la nei lo va; mahse, an party chuan engmah hmuh an nei lo niin a sawi ve thung.
“ED hian Sanjay Singh-a hi Adani chungchang leh a pawisa thianghlim lote a company tan a dah tamzia a sawi nasat avang chauhvin hetiang hian an ti a ni,” tiin AAP thupuangtu, Reena Gupta chuan a sawi a. “A hma pawhin engmah an hmu lo va, vawiinah pawh an hmu lo. Tute mahin engmah kan hlau lo,” a ti.
Gupta-i hian US-a investment firm pakhat, Hindenburg Research-in January-a Adani Group-in kum tam tak chhung sum leh pai an chelek dan dik tawk loh a tihchhuah chungchang chu a sawi a ni.
Singh-a hian hemi chungchang hi parliament-ah sawi chhuakin chhui ngei a phut a. Hemi chungchangah hian Prime Minister Narendra Modi-a pawh rorelna inah tawng ngei turin a phut bawk.
Nikum khan Delhi Health Minister Satyendra Jain chu sum tihchingpen thubuaiah man a lo ni tawh a, engmah tihsual nei lovin insawi mah se a la tang a, Delhi court-a bail a dilna pawh hnawl a ni.