French club RC Lens in beisei loh result an nei a. Arsenal lakah 2-1 a hnehna changin UEFA Champions League inkhelah Premier League club an barakhaih.
Stade Félix Bollaert-Delélis a Champions League Group B inkhelah hian Lens tan Elye Wahi a che tha hle a. Second half-ah minute 69-na a Przemyslaw Frankowski cross chu an chakna goal ni turin a khung.
Mikhual team hian inkhel tan tir atangin Lens player-te tha zat lamah an tluk pha lo fova, mahse player nei tha zawk an nihna langin minute 14-naah Gabriel Jesus chuan goal a khung.
Lens in minute 25-naah Adrien Thomasson hmanga goal khungin an si phurh an sut.
Arsenal hi tun season a an tlawm hmasak ber a ni a, hei mai hi ni lovin darkar chanve vel chauh an khel hman tihin player pawimawh Bukayo Saka chu inhliam avanga lakchhuah a ngai.
Arsenal coach Mikel Arteta chuan, “Hliam a neih sa a ni a, a inkhelhpui theih tho avangin kan chhawr a ni. A kheimit lamah a ni a, chuvangin tihnat belh awl a ni. A hliam nat zawng hi kan ngaihven zui zel a ngai ang.” tiin a sawi a. Hliam nei sa an khelhtir avanga khelh zawm tir lo an nih thu a sawi.
United an la nawi
Manchester United in season harsa an hman chu a la danglam lova, Galatasaray lakah vawi hnih hma hruai mahse an hum zo lo ve ve a, tihsual an ngah avangin 3-2 in an tlawm.
Old Trafford-ah United hian an striker thar Rasmus Hojlund hmangin minute 17-na leh 67-naah goal an khung a. Vawi hnih hma an hruai.
United in goal an khung apiangin Turkish club in an chhanglet thuai thei zel a. United goal chhuahna hi an tlarhnung tihsual a ni zel.
Minute 23-naah United tlarhnung in ball vawrh luh naran an ven theih loh an tuar a, Diogo Dalot chuan Wilfred Zaha veng thei lovin goal an chhuah.
An goal hnihna hi minute 71-na a lut niin Hojlund-a’n goal a khung hnu lawkah United centre-half pahnihten Kerem Akturkoglu hlauhawm siam zawnga a tlan lut tur ven nachang an hre lova. An goal hnihna an chhuah.
United goalkeeper Andre Onana chesualin Dries Mertens hma zawnah ball a pass avangin Casemiro-a’n penalty a chawi bakah red card a hmu a. Penalty hi Mauro Icardi chuan goal-ah chantir lo mahse a hnu lawkah United tlarhnung inthlahdah vang thovin an chakna goal a khung.
Group A inkhel dangah Parken Stadium-ah Bayern Munich in goal chhuah hmasa mahse Jamal Musiala leh Mathys Tel te hmanga chhangletin 2-1 in FC Copenhagen an hneh ve bawk.