Diwali thlen nan thla khat emaw awrh chauh hun a awm tling tawh lo va, he Hindu kût ropui ber (?) hi halpuah leh halmawi chi hrang hrang nen a inzawm tlat a; mahse, kumin chu boruak chhe lutuk avangin India ram khawi lai hmunah mah kum dang angin a hal theih dawn loh.
Boruak chhe lutuk hi a chhiat belh zel lohna turin Supreme Court chuan India chhim lam state tlem tih lohvah chuan darkar hnih chiah halna hun a hawng a. Hetih lai hian Assam-a khaw pakhat chuan, kum 130 zet an lo kalpui tawh, boruak tichhe ve thei lo halpuah leh halmawi an nei bik a, an khuaa an siam chhuah ngei a ni a, an duh chen chen an hal theih hmel riau mai.
Kum 1885 atang daih tawh khan Ganakkuchi khuaa chengte hian anmahni pualin halmawi hi an lo siam chhuak tan tawh a. He halmawi hi a puak a ring lo va, a alh ve lo va, chemical a tel lo va, mawi takin zan lamah erawh hal ên ve theih tho a ni thung.
“Heng kan thil siam chhuah hi halmawi him chi (green cracker) ang a ni a. Boruak a tichhe ve lem lo va, puak thei kan hmang nasa ve lo va; mahse, ram chhungah halpuah leh halmawi hal khapna kalpui a ni a, kan thil siam hi hal theih chin zingah a tel em tih hre tur chuan mi thiam enpuina kan mamawh a ni,” tiin an khuaa hetiang siam chhuak thin, Gopjit Pathak chuan a sawi a. “Kan khuaa miten keimahni pual liau liauva kan siam chhuah, kan khaw tih dan a ni,” a ti bawk a. Ani hi amah thlahtu chhawng li lai kal tawh atanga he khuaa hetiang halmawi siama sumdawng hi a ni.
Green cracker an tih ang hi chiang taka sawifiahna a awm lo va. Assam-a Pollution Control Board erawh chuan Ganakkuchi khuaa miten an siam ang halmawi, tualchher halmawi ang chi hi chuan halmawi dang aiin boruak a tichhe nep zawk nia sawiin bazara zawrh pawh a phalsak a ni.
“Mipuite hian eng hi nge green cracker tih hi chiang takin an hre fiah lo va. Keini hi chuan tualchher halmawite hi chuan boruak a tichhe nep tih kan hria a, Sivakasi-a an siam chhuah ang chi tih loh hi chu hman kan phal a ni,” tiin Assam State Pollution Control Board-a an member secretary B.K.Baruah chuan a sawi.
Company lian pangngaiin an siam thin ang hi dah thaa tualchher halmawi ang chi uar deuh deuh a nih theih nan state sorkar pawhin Ganakkuchi khaw bul lawkah hian a siamna hmun a bunsak nghe nghe.
Ganakkuchi khuaa hetiang halmawi him chu siamnaa thawk pakhat, Narayan Das chuan, “Khawl kan la nei chiah lo va; kan kutkawih liau liauva kan siam vek a la ni rih a, chi hrang hrang pawh kan siam thei rih lo va, siam pawh kan siam tam thei hek lo,” tiin a sawi.