Aizawl : Hindutva thlipuiin India ram a nuai mek lai hian Hindu firfiakte laka Mizo Kristiante thlavang hauh ngam chief minister huaisen Mizoramin a mamawh niin MPCC thupuangtu Dr Lallianchhunga’n a sawi.
Champhai South biala Indian National Congress (INC) candidate tur, MPCC thupuangtu Dr Lallianchhunga’n Thawhlehni zana Champhai Vengthara campaign a neihnaah, India ram chhungah Kristian te’n Hindu firfiak te dodalna leh nekchepna nasa tak an tawk fo thin a. Mizoram Chief Minister hlui, Lal Thanhawla kha India ram politician zingah pawh hnam dang te zah kai pha a nih avangin, Kristian ten harsatna an tawh chuan an thlavang hauh turin a che vat thin a. Hnam dang Kristian-te pawhin Lal Thanhawla kha an thlamuanpui fo thin tih sawiin, “Tunah erawh central BJP phena awm Hindu firfiakte laka Kristian te thlavang hauh ngam Chief Minister kan nei tawh lo va. Hei hi Mizo Kristian kan nihna ang pawhin kan ngaihtuah ho a ngai a ni,” a ti.
Dr Lallianchhunga chuan, kumin MLA inthlanpuiah Mizo Kristiante’n thlarau indona a hmachhawn ve thung dawn nia sawiin, “He thlarau indonaah hian Kristian te kan chak ngei ngei a ngai tawh a. Kan chak loh chuan kan ram, kan hnam leh kan sakhua hi dinhmun hlauhawm takah a ding ngei dawn a ni. Keini puitling zawk te hian he thlarau indona hi kan tu leh ka fate tan kan beih a ngai a ni,” a ti.
Mizorama zalen taka Kristian te an awm a tawk lo va, an missionary chawm ngei te’n Hindu firfiak te dodalna leh nekchepna an tawh mek laia MLA inthlanpui lo awm turah duhthlanna an siam sual ve ang tih a hlauhawm tia sawiin Dr Lallianchhunga chuan, “Manipura kan Zo hnahthlak unaute’n duhthlanna an siam sual a, nasa takin an tuar mek a, kan Zo hnahthlak unau BJP MLA te ngei pawh zuah an ni bik lo a ni. Manipur buainaah Central BJP sorkar khu a inrawlh tha duh lo va, a chhan chu Manipurah BJP sorkar tho a awm vang a ni,” a ti bawk.