Canada nena chawlhkar eng emaw zat an inkar a that loh tawh laiin India chuan Canada hnenah a palai 40 chuang zet chu la chhuak turin a ti nia sawi a ni.
Financial Times chanchinbuin a tar lan dan chuan October 10 hnu lama awmte chu palai an nih dan an chân dawn a ni.
Thla hmasa khan Canada hian a ram chhunga Sikh inlak hran tum pawl hruaitu pakhat thahnaah India a inrawlh thei niin a sawi a, hei hi India chuan a pha nasa hle.
Indian foreign ministry thuneitu chuan tuna thu thang awm chungchang hi engmah a sawi zui duh rih lo thung.
Canada hian India-in Ottawa-a palai a dah zat aia tam Delhi-ah hian a dah mek a, an inkara inrem lohna a chhuah hnuah India hian Canada chu inpalai tawnna tichhe zawnga awm lo turin a lo ti tawh.
Canadian Prime Minister Justin Trudeau-a chuan Thawhlehni khan India nena an inkar chu a chhe lehzual zawnga engmah tih an duh lo tih thuthar lakhawmtute a hrilh.
“A theih anga inrem siama India sorkar nena boruak titha turin ke kan pen zel a ni,” a ti.
Tun hma atanga ram inngeih tak pahnih hi September thlaa Trudeau-a’n June 18-a Hardeep Singh Nijjar-a thahnaah India hi a inrawlh thei nia a sawi atangin a chhe ta a ni.
Nijjar-a hi Canadian khua leh tui niin British Columbia-a Sikh temple tualah hmai tuam mipa pahnihin a lirtheia a chuang lai an kap hlum.
India chuan Nijjar-a hi kum 2020 khan mi firfiak tiin a lo chhinchhiah tawh.
Trudeau-a hian Canadian parliament-a thu a sawinaah an rama intelligence agency-ten an chhuinaah Nijjar-a thahnaah hian ‘India sorkar mi (agent)-te’ an inrawlh thei tih an hmu chhuak tih a sawi.
India chuan hei hi nasa takaphain foreign ministry pawhin hetianga sawi thei tura an thil hmuhte hrilh ve turin a lo ngen zui tawh.
Hetiang thil a thlen hnuah hian ram pahnihte hian an palai ve ve haw turin an lo intitawn tawh bawk.
September 21 khan India hian Canadian-te tana Canada-a an mission-te hnenah ‘venhimna thil’ avangin visa pe chhuak rih tawh lo turin a ti.
Foreign ministry thupuangtu, Arindam Bagchi chuan India hian ram pahnihte inpalai tawnnaah hian ‘thil tinghet leh tura a theih ang anga indawr’ a nih thu a sawi bawk.
“Hetiang thil hi Canadian-ten kan ram chhung thil an rawn khawihna a ni,” a ti.
Canada pawhin India-a a mi a dahte a titlem nghal a, palai thenkhat chuan social media-ah vauna an dawng niin a sawi nghe nghe.
“Tuna kan boruak sang mekah hian kan palaite himna turin hma kan la a ni,” an ti.
Canada-in India-a visa services a kalpui erawh dan pangngaiin an la ti reng.
US, UK leh Australia te chuan Delhi hnenah hian Canada-in thil an chhuinaah thawhpui turin an ngen hlawm.
Indian sorkar pawhin khawthlang ramte chu an rama Sikh inlak hran tum pawl, ram hran, Khalistan neih duhte laka na taka che ve turin a ti nghal a. Nijjar-a pawh hi Khalistan movement-a thawm nei lian tak a ni.
He movement hi India-ah hian kum 1980 chho velah khan helna nena chein Sikh tamna, Punjab-ah an lian hle thin a; mahse, tunah chuan nawr tawm an ni tawh.