Aizawl: MPCC President Lalsawta chuan kum 2023 inthlan hi ram roreltu thlanna a ni mai lo va, Lalpa indona a nih thu a sawi.
Kolasib Diakkawn YMA Hall-a nimina Kolasib District Congress Conference a hmanpuinaah MPCC President Lalsawta chuan, “Kum 2023 inthlan hi ram roreltu thlanna a ni mai lo, Lalpa indona a ni. A chakna ringin a lam kan hawia he leia a lal ram dina, ro min relsak turin a duh dan angin he inthlan hi Congress chuan a hmachhawn dawn,” a ti.
Politics ram hluia chengten pawisa an hmachhuan laiin Congress erawh chuan Lalpa, he khawvela a lal ram din tura dahtu lam an hawi niin Lalsawta hian a sawi a. Thlarau thianghlimin mipuite thinlungah hna a thawk a. Mi tha leh rintlak tak takin Congress an zawm zel a. Pathian duhdan taka inthlan an hmachhawn dawn avang hian an sorkar ngei dawn tih a rin tlat thu sawiin, “Hei hi Congress tan a ni lo, Pathian ropui nan, Mizoram mipuite tan a ni,” a ti bawk.
Lalsawta chuan MNF-ten retheite retheihna chu bahhnukte ang maia ngaiin Rs 25,000 an tawktarh chu dinchhuahna tur a thlen dawn chuang lo tih a sawi a. Tuna BJP leh a thawhpui MNF leh BJP thiana siam tum mek ZPM Party-ah hian ram dinhmun a thim hle tih a sawi a. Ram, hnam leh sakhaw nuai bo tumtu BJP chu do tur leh, BJP thawhpui ngai lo tur Congress hi Pathian hmanruaa ngai turin mipuite a chah.
Duhdah taka sum enkawl avangin Mizoramin leiba a ngah hle a. Naupiang hlim hnute tui chauh la ring pawhin leiba sing tel nei ang zel an ni tih sawiin, “Congress Party a sorkar chuan Mizoram sum kan siam tha ang a, Mizoram mipuite tan ‘|ang Puihna’ hmangin mipui dinhmun kan siam tha ang,” tiin, Old Pension Scheme tha takin an kal pui tur thu a sawi bawk.
He hun hi Lalthanpuia Khawlhring, GS ADCC in a kaihruai a. Kolasib INC Candidate S. Lalrinawma, Serlui INC Candidate Anggu Lalhmachhuana, Tuirial bial INC Candidate Henry Zodinliana Pachuau te pawhin thu an sawi a ni.