Italy-a Venice khawpui bulah, naupang pahnih telin mi 21 chu kawng chhawngah an chuanna bus tlan liama a kan zui avangin an thi niin thuneituten an sawi.
Mestre district-a chhiatna thlengah hian bus hian Venice pawhna lei a zawh laiin a sira a dalna su tlangin a hnuaia relkawng bulah a tla a ni.
Thi zinga panga chu Ukrainian an ni a, German pakhat leh Italian driver a tel bawk niin city prefect Michele Di Bari chuan a sawi.
Venice Mayor Luigi Brugnaro chuan ‘chhiatna rapthlak tak’ a thleng niin a sawi.
“A hmuh pawh a hrehawm a, thua sawi fiah mai chi pawh a ni lo,” tiin social media-ah a tar lang.
Bus hi khualzinten Venice leh Marghera district bul vela an inkulhnaa tlan kual tura an hman hawh nia ngaih a ni.
Chhiatna hi an ram sanaa Thawhtanni zan dar 19:45 (India-a zan dar 11:15) hnu lama thleng niin khualzinte hi an inkulhna hmun lama let leh tur nia hriat an ni bawk.
Bus hi methane gas hmang a ni a, a tlaknaah hian power line a su tel a, a kang zui ta nia sawi a ni.
Interior Minister Matteo Piantedosi chuan thi zat hi an la pung thei niin a sawi.
Tawhsual an tawh chhan hi hriat a ni rih lo va, chhanchhuah hna thawktuten a hmunah an la thawk chhunzawm mek bawk.
Mi 18 vel hliam tuar an awm a, an zinga panga chu an dinhmun a tha vak lo.
Chhiatna thlenna bulah hian a bul hnaia damdawi in chuan reception point siamin psychologist leh psychiatrist an dah nghal a, hei hi thi chhungte buaipui an ngaih laia puitu tura tih an ni.
Italy Prime Minister Giorgia Meloni chuan thil thleng chu a ngaihven reng thu leh a tuartute a tawrhpui thu a sawi.
EU Commission President Ursula von der Leyen pawhin hun harsa tak an tawh laiin Italian hruaitute kiangah an awm reng tih a sawi.
Kum 2013 khan Italian chhim lama Monteforte Irpino khuaa lei dawh sang takah bus-in car tam tak suin a hnuai kawr ruamah a tla a, mi 38 an lo thi tawh bawk.