NEC sum Rs nuai 1,000 senga sak, Lianchhiari Run (A multi Facility Centre) chu nimin khan I&PR Minister Lalruatkima’n khuallian niin hlanna hun buatsaih a hmanpui.
Lalruatkima chuan khawpui lailia department thawktute leh mipuiin an chhawr tangkai tur tha tak sak a ni chu ropui a tih thu a sawi a. Lianchhiari Run sak chungchangah hian rokhawlhna hrang hrang awm mah se, puiltin a ni ta chu lawmawm a tih thu a sawi a. NEC-in project atana a ken tel bak a chhung chei bawlna tur mamawhte chu SEDP atanga sum hmuh a nih thu a sawi.
I&PR minister chuan I&PR department chu sorkar hmalakna puang zartu, sorkar leh mipui inkar laichinna siam kawngah te, film, art leh a dangte hmasawnna atana hma lak kawngah leh journalist-te leh sorkar inkar thawhhona atan mawhphurtu pawimawh tak a nih thu a sawi.
Lianchhiari Run hi NEC sum nuai 900 leh state sorkar sum Rs. nuai 100 senga sak a ni a. December 14, 2017-a sak tan niin, kum thum chhunga sak zawh tur ni mah se, rokhawlhna hrang hrang avangin a hun takah zawhfel thei a ni lo a. A building ah hian chawng (storey) pasarih a awm a ni.