- Lalhruaitluanga Chawngte
Vawi khat chu hmun pakhatah hian lei a min a; a tawlhin a tawlh a ni ber zawk! A rapthlak a nia aw!
In te pawh a chhilh hial a, a chhunga chengte nen. A thawm ringawt pawh a hnu thleng pawha min tikhur thei khawp a ni. A rapthlak a nia aw!
Mi an tlankhawm a, chhanchhuaktu pawl an che nghal. Tlangval tlawmngaite’n an pui bawk. Mi dang chu an ngawi thuap. Mipui pungkhawm an han reh tlawk tlawk mai chu a mak duh a nia aw!
Nakinah chuan chhanchhuah hnathawktute’n mi pakhat an rawn zawn chhuak a, tunge a nih hriat a ni lo. Thawm a reh lehzual a, tlangval sana bun lai chek ri a hriat theih loh chauh.
Mite chu an tawngtai a, a ri lovin. An hmel han en ila, an rilruin an tawngtai tih a hriat a, mi an zawn chhuaha chu an khawngaih a ni tih a chiang ngawih ngawih. Nghah an nei a, chan an nei. Thlir an nei a, an thlir chu hmu pawh an ang chuang lo.
An mi zawna chu hmun himah an dah a, an bawihsawm nghal. Rei vak lo hnu-ah thu an rawn puang a – a la dam – a mar pawh a la phu! Damdawi in panpui nghal tur.
Chu thu an han hria, an lawmzia leh hlimzia kha!
Kut an beng a, a thenin ban an phar. A thenin mittui an hru. A then chu rem lo chung chungin an zuang. “Lalpa, kan lawm e,” tia au an awm a, a thenin Halelui an pe! “Lalpa chu fakin awm rawh se,” tia au an awm a, lawma zai ta rawng rawng pawh an awm. A thenin an bula mite an kuah vawng vawng. Mihringin tum lawk pawh awm lova hmelhriat lohte an han kuah vawng vawng mai hi a lo ril asin aw!
Mak ka ti a: kha tlangval kha tunge a nih an hre miah lo a, an chhungte emaw an thian emaw a ni lo a ni mai lo, amah an hre lo hrim hrim. A hnuah khawlaiah inhmu leh pawh ni se amah a ni tih an hre chuang lo ang. Mahse khaw dang an hawisan thei lo a, thil dang an ngaihtuah thei hek lo. A lam an hawi a, a dam nan an tawngtai. Amah vangin lawmthu an sawi a, amah vangin Pathian an fak.
A hnu-ah pawh ka ngaihtuah zui fo a, chu tlangval chu hmuh te pawh ka chak thin; “Enteh, i dam nan mi an tawngtai a, i dam avangin mi an lawm a, Pathian an fak hial asin. I dam avangin miin Pathian hnenah lawmthu an sawi a, a then phei chuan ban an phar zu nia! I va han chang sang, i chan hi a ropui asin!” tia hrilh ka chak thin. “Heti taka an duh mai che hi… eng mi nge i nih?” tih te pawh ka duh.
Mahse, ka’n ngaihtuah chiang a, kha tlangval kha mi dang nen an dinhmun a inang reng tih ka hre chhuak ta a.
Kha tlangval vanduaina ang kha tawh ve ka hlau a, Lalpan min humhim tlat se ka ti, ka beisei bawk. Khatiang thil kha, ngaihtuah that ngam loh khawp a ni a, mahse ka ka ngaihtuah chhuak leh thin!
Tawngkhawlo ni lo sela, mi an zawna kha keimah lo ni palh ta ila, khatiang khan mi kha an lawm ang a, hlimin an lam dawn tih te, khatiang khan ka dam avangin lawmthu an sawi ang a, Pathian an fak ang tih te ngaihtuahin ka harh ta! Khawvel hian min duh tihna a nih chu.
Mi hian min duh a, min duhsak a ni tih ka hre ta, khawvel hian min duh a ni tih ka hre ta. Mi hian min khawngaih a, eng ni lo mah ila, tling lo hle mah ila, mi chuanhnuai leh chumchiap mai mah ni ila, tawmkai lo leh tangkai lo tak ni mah ila, khawvel hian min duh a ni tih ka hria! Ka harh ta. Ka va han hlu em aw!
Kha tlangval, leimin kar atanga an zawn chhuaha kha, khatia a dam avanga mipui an lawm em em lai khan, mite khan kha tlangval kha a hmeltha em tih an ngaihtuah lo a, a ngo nge a hang tih te, a hausa em tih te an ngaihtuah lo. A seilenna, a background te an chhut si se lo a, a lo rap pelh palh tawh em tih pawh an ngaihtuah lo. Mihring a nihna kha a ni an en ni. Chumi ka ngaihtuah chang chuan ka thaw huai thin! Mihring a ni a, an duh a ni tawp mai, an duhsak a ni tawp mai. Ka va han lawm!
Hetia ka lo awm ve hian ka lo hlu em em mai hi a lo ni a, awm ve turin khawvel hian min duh, min duhsak a ni. Engmah ni lo mah ila, engmah lo mai mah ni ila, khawvel hian min lo pawm alawm. Chu chu ka tih a ni lo.
Mihring ka nih hian ka lo hlu nghal tawp mai hi a lo ni a, mihringa min siamtu chunga lawmthu sawi leh amah tih hi ka tih tur a lo ni.
Chutiang ka ngaihtuah chuan ka hlim a, mahni chauhva ka awm lai pawhin ka nui ve ver ver thin – khawvelin min chhiatkhum lai leh mi ka phak lohzia ka hriatchhuah chang te pawhin, chumi ka’n ngaihtuah chuan tum angin ka duah hluah hluah a, Lebanon tlanga sidar thing angin ka thang leh uak uak thin!
Ka lo piang ve hi ka lawm a ni. Malsawmna a ni.