Rorel lai, MNF party chuan nimin khan kumin Mizoram MLA inthlanpui neih tur atana bial 40-a an candidate turte an puang a, campaign an hawn nghal bawk.
MLA candidate tur puanna leh campaign hawnna inkhawm hi MNF Vice President Vanlalzawmna kaihruaiin MNF President Zoramthanga’n thu sawiin, party thenkhat chuan candidate an inchuh laiin an party erawhin Pathian tanpuinain Candidate an set fel thei tih a sawi a, candidate an set tha tak takte chu mipuite lo tawiawm theuh tur leh lo support theuh turin a sawm a, Pathian leh mipuite zarah sorkarna an la ngei dawn tih a sawi.
MNF party-in candidate tur an puan taka a lan danin an president, Zoramthanga chu a bial ngaiah ding nawnin bial pakhatah chauh a ding dawn a ni.
An bial enkawl lai meka ding dawn tur hi mi 23 awmin, mi pahnih chu bial dangah an ding dawn a, hmeichhe candidate pahnih an nei dawn a; B.Lalawmpuii chu Aizawl East II bialah a ding dawn a, West Tuipui biala ding tur chu Prova Chakma a ni.
Kum 2018 MLA inthlanpui neih tuma candidate tling zo ta lo ding leh tur an awm a, Hachhek biala dinga tling ta lo, Lalrinenga Sailo chu Tawi bialah a ding dawn a, Aizawl South II bialah inthlan hmasaa tling lo, Denghmingthanga chu dintir leh a ni dawn a, Thorang biala ding tling zo ta lo, R Rohmingliana pawh he bialah hian a ding leh dawn.
MLA inthlannaa la ding ngai lo ding tur an awm nual a, chungte chu Aizawl West III bialah mi thar, Er.K.Lalsawmvela a ding dawn a. Aizawl North II-ah Vanlalsawma, Chalhfilh bialah K Lalhmangaiha, Hrangturzo bialah Lalremruata Chhangte, Serchhip bialah J Malsawmzuala Vanchhawng te an ni.
Candidate puanna leh campaign hawnna inkhawmah hian MNF Sr.Vice President Tawnluia’n thu a sawi a, MNF thalaiten ram leh hnam tana MNF pawimawhna hrang hrang essay inziah siak leh reels contest an buatsaih lawmman semna hun hman a ni bawk.
- Candidate puante :
Aizawl East I – Zoramthanga
Lawngtlai East – H Biakzaua
Tuichang – Tawnluia
Lawngtlai West – V Zirsanga
Tuirial – K Laldawngliana
Kolasib – K Lalrinliana
Dampa – Lalrintluanga Sailo
Mamit – Er H Lalzirliana
Serlui – Lalrinsanga Ralte
Tuivawl – Lalchhandama Ralte
Chalfilh – K Lalhmangaiha
Tawi – Lalrinenga Sailo
Aizawl North I – R Lalzirliana
Aizawl North II – Vanlalsawma
Aizawl North III – C Lalmuanpuia
Aizawl East II – B Lalawmpuii
Aizawl West I – Zothantluanga
Aizawl West II – Lalruatkima
Aizawl West III – Er.K.Lalsawmvela
Aizawl South I – K Vanlalvena
Aizawl South II – Denghmingthanga
Aizawl South III – Dr F Lalnunmawia
Lengteng – Dr L Thangmawia
Champhai N – Dr ZR Thiamsanga
Champhai S – TJ Lalnuntluanga
East Tuipui – Ramthanmawia
Serchhip – J Malsawmzuala Vanchhawng
Tuikum – Er Lalrinawma
Hrangturzo – Lalremruata Chhangte
South Tuipui – Dr R Lalthangliana
Lunglei North – Dr Vanlaltanpuia
Lunglei East – Lawmawma Tochhawng
Lunglei West – C Lalrinsanga
Lunglei South – Dr K Pachhunga
Thorang – Er R Rohmingliana
Tuichawng – Rasik Mohan Chakma
Palak – KT Rokhaw
Siaha – HC Lalmalsawma Zasai
West Tuipui – Prova Chakma
Hachhek – Robert Romawia Royte