Pakistani sorkar chuan thuneitute hriatpui lohva an rama himna zawnga awm Afghan-te chu November hmaa chhuak vek turin a ti a, hengho hi mi maktaduai 1.7 vel zet an ni.
Kuminah ram pahnih inrina lai bawra helho chetna a pun thar leh avangin an inkar hi a tha vak lo.
Pakistan hian Afghanistan-a awm helho chetnaah heng hi a puh a, Taliban roreltute erawh chuan an pha ve thung.
Pha nasa hle mah se Islamabad chu a thu ngaiah a ding a, Thawhlehni khan ‘dan lova’ pemte dap chhuah hna thawhna tur a puang a ni.
Kar hmasaah khan Afghanistan ramri bul, Mastung khawpuia mosque-ah pawh bomb tihpuah niin sakhaw thila pungkhawm mi 50 vel lai an thi a ni.
Pakistan Interior Minister Sarfraz Bugti chuan Balochistan province-a beihna thleng pawh Afghanistan atanga lutte tihah puh chiah lo mah se Thawhlehni khan ‘dan lova’ an rama Afghan awmte dap chhuahna tur hi a puang ta a ni.
Khawvel danin ram danga himna zawn hi a phal a. Pakistan pawh hian Afghan raltlan sang tam tak a mikhual a, heng zinga a tam ber hi kum 2021-a Taliban-in Afghanistan-a thuneihna an chan leh hnua mite an ni.
Afghan raltlan hi maktaduai 1.3 chuang ziah luh an ni a, heng bakah hian mi 8,80,000 zet chu Pakistan-a dan anga awm phalsak an ni bawk niin UN chhinchhiahnaah tar lan a ni.
Hengho bakah hian mi maktaduai 1.7 chuang chu an ramah ‘dan lovin’ an awm niin Thawhlehni khan Bugti-a hian a sawi a, hengho raltlan nihna engmah an nei lo niin a sawi bawk.
Hengho zawng zawng hi tun thla tawpah hian an ram chhuahsan vek turin a ti a, a nih loh chuan tharum emaw, tihluihna hmangin emaw nawr chhuah an ni dawn tho tho tih a sawi.
“An chhuak lo a nih chuan… province emaw, sorkar laipui hnuaia mi emaw, dan kengkawhtuten thawn chhuah an nih theih nan chet an la ang,” tiin a sawi niin sorkar chanchinbu chuan a tar lang a. Eng ang chiahin nge an chet dawn tih erawh engmah a sawi lo thung.
An ram chhunga ‘dan lova’ Afghan awm mekte leh sumdawnna an lo kalpuite hai chhuaktu tur taskforce an din dawn tih a puang bawk.
Pakistani sorkar thupek chungchangah hian Pakistan-a Afghan thuneitute chuan tual chhung hmun thenkhatah dan ang leh dan lo anga Afghan awm mekte dap chhuah hna thawh reng a nih thu tawh a sawi.
X-a an embassy-in thuchhuah an siamah chawlhkar hnih liam ta chhung khan Afghan 1,000 chuang man an ni tawh tih an tar lang.
Pakistan nena an inrina lai, Balochistan province chu ralthuam keng, Tehrik-e Taliban Pakistan (TTP) emaw, Pakistani Taliban emaw leh Islamic State helho chet tamna lai hmun a ni.
Tun thla tirah khan district thuhmuna beihna thlengah Muslim hruaitu hriat hlawh tak telin mi 11 velin hliam an lo tuar tawh.
Tual chhung chanchinbu, APP chuan Islamabad hian an rama dan ang a ni emaw, ni lo emaw, Afghan awm zawng zawngte chu chhuahtir vek an duh niin an tar lang.
Bugti-a chuan kumin January atang khan Pakistan ramri hnaihah thihchilh bomb vawi 24 lai tihpuah tawh a nih thu a sawi a, heng zinga a zahve aia tam mah hi Afghanistan-a helho tihah a puh bawk.
November 1 atang hian Pakistan-a Afghan luh dan pawh tihkhaih a ni dawn a, visa leh passport nei chauh an rama luh phalsak an ni tawh dawn a ni.