- Mahmuaka Chhakchhuak
Lunglei MZI te buatsaih Oldies Night chu Oct. 2, 2023 zanah khan Convention Center, Lungleiah hlim taka hman a niin a hmuna kalte chu an inchhir a rinawm loh hle a ni.
Zai ngaina mi chu ka ni hauh lo a, zai erawh hrat ve tak, zai kal rut rut chi hi ka ni reuh a, zaithiam erawh ka ni lo tih chu vawi khat pawh zai tura koh leh sawm ka la nih loh atang hian mi zawng zawng hriat a ni thung awm e. Kan thianpa Henry-a hian Oldies Night buatsaih a nih dawn thu leh amah pawh a zai ve dawn thu min hrilh a, amah tawiawm ngei chu tha ka ti viau mai a, a ruk chuan ka inbuatsaih nghal deuh a. Chutianga tum ang reng, tum lutuk si loa ka awm mek lai chuan tunlaia history lam ka sawipui fo leh ka bengvar phah thin em emna Pu J. Zorema hian WhatsApp lamah message min rawn thawnin Oldies Night-a tel theihna tur ticket a neih thu leh kal a tum si loh thu min rawn hrilhin ka kal duh chuan ticket chu min pek a phal thu min rawn hrilh a, chhe hei, ka tan vanneihna ropui tak a nih chu tiin ka lawm hle a. Ka thianpa Henry-a zai hunah ka lam thei ngei dawn e ka ti rilru rauh rauh nghal bawk a.
Tlaiah chuan fai takin ka inbual a, ka confi pui ngei tur thawmhnaw ka ha bawk a. Zanriah pawh phur taka eiin zan dar 6;30 velah Convention Center lam chu ka pan a, ka chhuah dawnah perfume ka in phuh ser ser bawk a. A hmun ka thleng a, mi an lo awm vak lo a, ala hma a nih hi tiin a kiang lawka dawrah chuan Coffee ka lam a, mi chevel thlirin ka thu khawmuang a. Dar sarih rik dawn tepah chuan current a rawn awm lo a, Convention center chu a thim thup mai a, generator/ Inverter an nei lo em ni ka han tih lah chuan ‘Nei lo a ni ang’ an ti bawk si a, heti chuan a chi loh ang aw ka ti rilru nauh nauh a. Dar sarih chu tan hun a ni si, dar sarih a rik tep tawhah pawh chuan ala eng bawk si lo chu ka lo buai ve em em mai a, dar sarih pelh hretah chuan kan lut a, reilote kan han thut hnuah chuan current chu a rawn awm ve ta hlauh mai a, ka thaw huai mai.
Kan in atanga ka chhuah hmaa Ticket cheng Zanga man awrh sa reng ka nih bawk avang chuan ticket Zathum man pawh awmin Zanga man chu a to zawk an tih avang chuan tlar hma lama thu tur ka ni ang tiin tlar thumnaa thut tumin ka pan a. Nimahsela tlar hma chu thutna tha alo ni lem lo a nih ka ring leh hnuhnawh a, a chhan pawh kan Khuallian, Agriculture Minister chu tlar hnung lamah thutna an siam sak tlat mai. Hall luh dawn hnaihah kan thenawmnu Numaruali te team chu zai ve tur an u, Pu Zosangliana Murray tawiawma lo kalte nen kan inhmuh avangin anni rual chuan Hall ka lut a ni nain hnung lamah min insawn san leh tak avangin keimahin ka thu a, a hnu deuhah hmelhriat lem lohte hi ka kiangah chuan an rawn thu a, inbe lem lo chuan ngawi hle hlein kan thu a.
Dar engzat chiahah nge kan tan tak ka hre mai lo a, a hmasa berin Lalenkawlin Pautu a rawn zai a, Puan ang a chul tih hla a rawn thlawh a, a ni hi chuan zai chauh a thiam lo a, stage performance pawh a thiam hle mai. A tir lamah thu chungin a han zai vang vang phawt a, thlirtu mipui mit lak dan tur berin a chevel thiam a, a hnuah a rawn ding a, a inthuamnain a zir bawk a, chevel reng reng chu a hmuhnawm vel vek mai. Announcer-te pahnih mawlh khan mipui an chawk phur thiam bawk ka ti a, ‘Tunah chumi chu a rawn zai ang…….’ Ti satliah loin an hla sak tur leh hla phuahtu chanchin tawite mai bakah a then phei chu chu hla phuah chhante an sawi thei zel kha a ngaihnawmin a bengvarthlak ngawt mai. Mi chi hrang hrang leh ngaihtuahna hrang hrang neite kan rilru hruai khawm dan an thiam ka ti a, a ti awm tak turin kha chanvo pawimawh tak kha an chang niin ka hria.
A buatsaihtute lama sawi lawk duh ka neih chu, an inbuatsaihna a tha tih a hriat a, tihsual leh programme khailak awm hauh loin tluang taka hun kan hmang theih kha a lawmawm hle a ni. Mak ka tih leh ka lawmna em em chu mineral water an sem mai bakah a duh apiangte tana thingpui thlum leh thingpui senhang leh a hmeh an buatsaih thei kha niin programme ti nuam tu pakhat a ni. Room pakhatah hian a duh apiangte tan an hung tawp a, a duh duhin kan va in mai thin a, a buaithlak dawn tehlul nena khatianga an buatsaih thei kha a lawmawm hle a ni. Kei phei chuan inti cool tak chungin thingpui senhang no hnih ka in nghe nghe kha.
Zaithiam zai ngaihthlak a nuamin an chevel hmuh a hahdam vek hlawm a, mipui lam pawhin a tir lama kan han inthlahrung deuh hlek tih loh chu mi pathum vel an han zai chinah chuan kan lam suau suau tawh a, a boruak tawh hle. Ka hriat sual loh chuan Pu Zosangliana Murray leh ka thianpa Henry te chiahin sap hla an sa a, Pu Zosangliana hian Green green grass a home tih hla a sa a, Henry chuan Elvis Presley hla Jailhouse rock a sa a, ava han hnehsawh tak em aw. Elvis a rawn tho leh hi a ni ringawt mai a, a khup sek dana a han sek vel te phei chu keini thiam chi rual hi niin ka hre lo. A hlain a zir nge a satuin boruak a neih vang tih chu ka hre lo nain mahni awmhmun lo lam leh thutna hma lama lam chhuak pawh sawm eng emawzat an ni ngei ang. Lam ngei ka tum a, video-a cover ka duh bawk si, awmhmunah ka lo indaih lo em em ve ringawt mai pek a, ban lehlam ka vai a, lehlamin Cell phone ka hum bawk a, indaih loh a na duh ngei mai.
Ngurhlunzama Chhakchhuakin Ngaihzual nangnen tih hla a sakte, Emy Khawlhringin Kar a hla tih hla a sakte, R. Lalhmangaiha’n Sure loh paw’n ngei ngei tih hla a sakte, C. Vanlallawma’n Buannel Ramdai tih hla a sakte, C. Lalzahngoa’n Rawllai ka di tih hla a sakte, R. Lalvensanga’n Di Chambawihpui tih hla a sakte, Lalenkawlin Pautuin Ve dawn lawm ni tih hla a sakte leh hla dang satu reng rengte hla sak kha ngaihthlak a khamawm loh vek mai. An inbuatsaihna a tha tih a chiang reng a, hlim tak leh phur taka an sak vek avangin a thlirtu lam mit a tlai bawk a ni. C. Lalzahngoa leh Lalenkawlite Duet kha hmuh an va nuam tak e aw……
Tu zai laiin nge tih erawh ka hre ta chiah lo nain kan Khuallian Pu C. Lalrinsanga chu an pawt chhuak a, an lam pui a, kan DC pawh thut tir mai mai bik loin an lam pui bawk a, boruak a nuam hle a ni. A tawp bera ka sawi duh chu, hetiang hunah hian zurui leh buaina siam hi an awm thin emaw ka tih laiin Oldies Night-ah erawh hi chuan zurui leh buaina siam hi ka hmu miah lo a, an awm lo a nih pawh ka ring a, ka lawm hle a ni. Zu hi lo thlah zalen ta pawh ni ila kan thalaite zingah hian in duh lo awm mah sela, ruih leh buaina siam hi an tum kherin ka ring lo a, midang tihbuai hi a tunlai tawh lo tih kan hre tawh niin ka hria.
Oldies Night tih takah a zaite reng reng khan hla hlui lam an hrut a, a lunglenthlakin nunhlui (nunhlui nei ve ang maiin) a ngaihawm a, Arkaidenzan-a thianhoa ring tak taka han zai thin laite kha kan han hrechhuak uai uai bawk a, mi tam tak karah khua alo har veng veng lehnghal a. Khatianga kan zaipui thenkhatte lah chuan mual min lo liam san tawh bawk a, khawhar a zual thin hle mai. Oldies Night zet chuan nunhlui min ngaihtir ngawt lo a, khua a ti har zual ngawt mai….