Aizawl: Working Committee on Ruihhlo Do buatsaihin nimin chawhnu khan Aizawlah Ruihhlo Do Kawng Zawhpui neih a ni.
Ruihhlo Do Kawng Zawhpui hi thuang hniha neih niin Millenium Centre kawt leh Sikulpuikawn atangin zawh tan a ni a, kawng zawhtute chuan ruihhlo chu ram hmelma a nih thu te, ruihhlo tel lova hlim theih a nih thu te, ruihhlo zuartute chu ram leh hnam hmelma an nih thu leh ruihhlo tel lova ram nuam siam tura tanrual a pawimawh thu te bakah, ruihhlo man chhuahna kawngah sorkar tawiawm zel a pawimawh thute an auchhuahpui a, ruihhlo leh a kaihhnawih laka inhnamhnawih lo tur leh ruihhlo do kawnga theihtawp chhuah turin thutiam an la nghal a ni.
Hmun hnih atanga kawng zawhtute chu Raj Bhavan Hmar lam gate-ah intawkkhawmin, he hmunah hian inkhawm neih chhunzawm a ni a, khuallian Social Welfare Minister Er. Lalrinawma chuan ruihhlo leh a kaihhnawihte do kawngah sorkar leh YMA bakah NGO dang leh kohhranten theihtawp an chhuah thin chu lawmawm a tih thu sawiin, thahnemngai taka ke pen chhunzawm zel turin a chah.
Excise minister ni bawk chuan, nunna hlu tak chhan nan ruihhlo do let a tul thu sawiin, kalkhawmte chu mi ai baka nawm tumna thlahlel lo tura chahin, mipuite chu ruihhlo do hna chu sorkar department chanah dah bik mai lova, zavaia mawhphurhna a ni tih hriaa theihtawp chhuaha tanrualpuiah a sawm a ni.
Raj Bhavan hmar lam gate kawta inkhawm neihah hian Core Committee on Ruihhlo Do vice chairman, Central YMA President R Lalngheta bakah MZP leh MSU hruaituten thu an sawi bawk a ni.