Aizawl : Mizorama MLA inthlan lo awm tur atana inbuatsaihna kal zelah nimin khan candidate-te campaign senso chhutna atana Lawngtlai district chhunga hman tur thil man bitukna (rate chart) chu Lawngtlai district Dy. Election Officer Abraham Beirazi Khithie hova bithliah a ni.
MLA inthlanpui lo awm tur atana Lawngtlai district-a rate card siamah hian – Hall, thutthleng, Sound System leh ei tur chi hrang hrang man bithliah a ni a. Lirthei hman man, Flag leh Banner siam man bakah Cable TV leh chanchinbua pek chhuah chi fakna tihchhuah man te bithliah a ni bawk.
Election official-te, ERO, AERO, DIPRO, Treasury Officer, Assistant Expenditure Observer-te bakah, political party hrang hrang aiawhte rate bithliahnaah hian an tel a. Inthlan campaign na atana bungrua leh thildang mamawh hrang hrang awm thei tur te ngaihtuahin, a man tur awm ang an bithliah nghal a. Hemi zulzui hian candidate-te campaign senso chhut a ni dawn a ni.
Election Commission of India (ECI)-in inthlan campaign sensova candidate-te sum hman theih zat a bituk angin, Mizorama MLA inthlanpui lo awm tura candidate pakhatin campaign senso atan sum a hman theih tur zat chu Rs. nuai 28 a nih thu sorkar thuchhuah chuan a tarlang bawk.