Inter Milan in tun season UEFA Champions League-ah a vawikhatna atan hnehna an chang a. Benfica lakah 1-0 a chakin Marcus Thuram goal khung an chakpui.
Group D inkhel hi San Siro-ah khelh niin first half-ah team pahnihten goal hlauhawm mumal an siam thei lova. Benfica goalkeeper Anatoliy Trubin chuan Denzel Dumfries lakah save tha a siam a. Lehlamah Yann Sommer pawhin Fredrik Aursnes goal khung tur a dansak.
Second half-ah erawh Simone Inzaghi pawlte an chungnung a. Dumfries-a’n goal a khung teuh nawn leh bakah Lautaro Martinez chuan chance tha tak vawi hnih a nei a, crossbar a tih per.
Thuram-a’n minute 61-naah Inter Milan tan goal a khung a, kheltha tak Dumfries-a’n Nicolo Barella ball pek tha chu la in a cross a, France striker in goal-ah a khung.
Thuram chuan, “Point thum kan hmu hi kan lawm. Kan group match vawi hnihna a nih avangin chak kan tan a pawimawh a, kan fans te hmaah kan mualah a ni bawk hi thil tha tak a ni.”
“Goal khung lo mah ila midangin an khung thovang. Zaninah ka khung zan a ni a, chuvangin ka lawm hle.” a ti.
Inter hi an group match hmasa zawkah 1-1 a Real Sociedad nen inhnehtawk tawh an ni a. An coach Inzaghi chuan, “First half-ah kan inthlauhna a tam lova, kan inhnehtawk hle. Hmahruaitu ni thei remchang vawi hnih thum vel kan insiam a, kan hmang tangkai lo.”
“Second half-ah erawh kan bei nasa hle a, tih tak zetin kan bei. An goal kan nawr apiang khan kan hlauhawm em em a, team tha Benfica ang lakah hetiang kan ti thei hi thil tha a ni.” tiin a sawi.
Group D inkhel dangah Spanish club Real Sociedad in Austria-ah hnehna an chang a. FC Salzburg chu 2-0 in an hneh.
Red Bull Arena Salzburg-ah La Real hian first half-ah goal hnih an khung a. Inkhel tan atang thununtu zawkah tangin Mikel Oyarzabal hmanga minute 7-naah goal an khung hnuah minute 27-naah Brais Méndez chuan Champions League match hnih atanga a goal hnihna a khung.
Oyarzabal-a’n La Real tan goal khung belhna remchang tha tak mai vawi hnih a hloh a. Salzburg in second half-ah penalty an hlawhchhuah tawh chu video assistant referee hmanga hun engemaw chen chhung ennawn leh a nih hnuah thutlukna sut a ni a, hei hi an goal khung teuh ber a ni.