Aizawl: Mizoramin kumina MLA inthlanpui a hmachhawn turah Central YMA chuan nimin khan ‘Inthlan thuchah’ tichhuakin candidate zingah zu ruih hmangte, eiruk chingte leh nungchang thlahdah te chu vote lo ngam turin mipui an chah.
Central YMA chuan ram rorelna chu mipui siam a nih angin a chhiat a thatah mawhphurtu an ni tih hriaa khua leh tui dik takte chu vote thlak theuh turin an ngen a. Mizo hnahthlak zingah chi bing/kohhran bil inthliar hrang zawnga chetna chu tha an tih loh avangin inthlan turah chi bing/sakhaw bing puala candidate siam lo turin political party leh mipui an ngen.
Political party-te chu candidate-ten khawtlang huapa ruai siam lo tur te, danin a phal chin bak leh khawtlang tana ninawm leh hnawksak thei tur ang chi aurinna hmang lo turte, kumtlinglo leh thil kalphung hre pha lote inthlan boruaka hnuk lut lo leh hmanruaa hmang lo turte, party manifesto-ah a taka tihhlawhtlin theih ngei tur chauh tar lang turte, hmanraw thianglim lo chelek lo tur leh sum leh therhlo dang hmanga vote lei leh hralh lo turte, mipui, pawl leh kohhran te pawhin candidate te sum leh thil dang dil lo turte, social media-ah thu belhchian dawl lo leh finfiahna awm lo te party hamthatna atana thehdarh lo turin mipuite an chah a ni.