Transport Department hnuaia Enforcement Staff leh Aizawl Traffic Police tangkawp chuan nimin atang khan Aizawl khawpui chhungah lirthei document endik hna an kalpui tan a, dan bawhchhia 88 an man.
Co-ordination Committee on Traffic Management ruahmanna in Special Enforcement Drive hi nimina atanga nakum March 22 thleng kalpui tur a ni a, a bul tanni nimin khan lirthei document fel lo 88 manin, lirthei an man zinga 47 chuan dan bawhchhiat man an chawi nghal a, nimina an chawi zawng zawng hi Rs. 1,07,000 a ni.
Lirthei an man zingah hian insurance thi an man tam ber a, a dangte chu pollution certificate tihnun ngai te, driving licence nei lo leh commercial vehicle permit thi te a ni.
Lirthei document endik hna kalpui a nih avanga ngaih theihin nimin zing atang khan Mizoram Pollution Control Board hnuaia lirthei khu endikna hmunte chu a lun nghal hle a, MINECO-a lirthei khu endikna hmunah chuan lirthei thahnem tak pollution test tur an intlar nileng a ni.
Aizawla lirthei khu endikna hrang hrangte hi office kai niah chuan ni tin hawn ni mah se a lun lo hle thin a, transport leh traffic police-in lirthei endik rûnpui an neih apiangin a lun hle thin a ni.