Delhi-a Sir Ganga Ram hospital-a thoracic surgeon Srinivas K.Gopinath chuan chuap lam tha lo avanga a damlo enkawl mek tlangval tan chuan tun lai Delhi khawpui boruak chu ‘thi tura hremna pek ang mai a ni,’ tiin a chhiatzia a sawi.
Delhi-a chengte hian nimin tuk atang khan boruak khu zing chuai mai an tawng tan a, Hindu kûtpui, Diwali chu hnai tawh hle mai se he boruak tha lo hian chanchin a luah hneh rih hle.
Pathianni khan tun thla chhunga Delhi-a boruak a thian ber tum a nih thu central pollution control agency said chuan a sawi a. Diwali lo thleng turah hian Supreme Court thupek angin National Capital Region (NCR) huam chhungah halpuah leh halmawi him chin leh boruak tha lo tichhuak tlem chi chauh zawrh leh lai khap a nih avangin ziaawm zel tura ngaih a ni a; mahse, hmarthlang lama Punjab leh Haryana-a lo neitute lo hal khu chu thliin a len luh avangin boruak a pik thar leh hle a ni.
Boruak tha lo hip luh avang hian kum tin naupang za tel an thi ziah thin tih WHO chuan October thla mai khan report a siamah a tar lang a. Tun tuma Delhi boruak pawh hi doctor-te chuan an hlauthawng hle tawh a, ‘hmuh theih lohva mi thattu’ ang hiala chhuahin chuap tha lo leh thawkna lama harsatna neite tan chuan thi tura hremna inpek tluk zeta hrehawm a nih thu an sawi hial tawh a ni.
Kum tin tun ang hunah hian an thenawm, Punjab leh Haryana-a lo neitute lo hal khu avangin Delhi boruak a chhe zual ziah.
Chhung tin an inring hle a. Mamawh thut a awma hman turin thawkna damdawi lam an kawl fur a, pawn chhuak tam lo turin an inhrilh a, mi mal lirthei leh two-wheeler pawh hmang tam lo turin an inti.
Tun tum boruak tha lo leng hian ni 2/3 vel a la awh an ring.