Cheng nuai 972 senga MINECO Multi Level Parking leh Open Gym MINECO inkar, MINECO junction hmun ruaka vantlang hmun sakna tur, ‘Construction of Urban Landscape & Avenue Plantation’ tih chu nimin khan UD&PA changtu Deputy Chief Minister Tawnluia’n a lungphum a phum.
MINECO-a MRB Conference Hall-a lungphum phumna inkhawmah Tawnluia chuan, hma thlir thui tak nei a hnathawh kawngah tan lak zel a pawimawh thu a sawi a. Hmathlir leh rawtna nei, tute tan pawh sorkarah a thlen theih a, sorkarin a dawngsawng thei reng tih sawiin, “Ram hi a neitu theuh kan nih angin tupawhin thurawn leh rawtna an neih ang angte inthlahrung lova thlenin, sorkarin a dawngsawng thei a, lawm takin a hmang tangkai thei reng a. Mipuite hi sorkar neitu kan nih angin sorkar hi kan ta neih vek a tul a ni,” a ti.
UD&PA minister chuan Smart City Mission hnuaiah state tinte cheng vbc 500 theuh sorkar laipuiin a pe a. Chumi hmanga hnathawh tura duan chu thawh zel a nih thu leh, hripui avanga thawh chak tawk loh tam tak awm avangin nakkum June thlengin Central lamin a pawhsei sak a, hun tiam chhunga zo hman turin theihtawp chhuah a nih thu a sawi.
Tawnluia chuan office dawrtu mipui leh office hnathawkte tan pawha chawlh hahdamna tur leh tuallenna tur MINECO-ah siam a ni tur leh a lunghum phum a ni ta chu lawmawm a tih thu a sawi a. Khawpui tihmasawntu leh mipui tana hmuh hahdam leh chawlhna hmun nuam a nih ngei a beisei thu a sawi bawk.
He hmunah vek hian Deputy Chief Minister chuan ASCL hmalakna thoa, 5G/Smart Ambulance leh khawpui huam chhunga YMA Branch 108 te hnena hnenah kangmei a chhuah palh a, a thelhna tur hmanrua ‘Portable Fire Fighting Pump with Ancillary Equipment’ chu Central YMA hnenah a hlan bawk.