French Catholic clergy-te chuan kum 1950 atang khan naupang 2,16,000 vel zet mipat hmeichhiatna lam hawiin an lo khawih thin niin a hranpaa chhuitute chuan an sawi.
Kohhran mi pangngai (layman)-te khawih hriat chian a nih phei chuan naupang 3,30,000 pawh an tling hial thei niin a sawi bawk.
A chhuitute zinga hotu, Jean-Marc Sauvé chuan an thil hriat chhuah zat chu a mak a tih thu a sawi.
French Church chuan ‘zahthlak leh rapthlak’ a nih thu sawiin ngaihdam an dil nghal bawk.
An khawih zinga pakhat inpuanna chu France ram chanchin a inher danglamna a ni pakhat.
Tun tuma thil chhui chhuah puan hi mipat hmeichhiatna lama Roman Catholic Church mualphona lian tak thar ber a ni.
Chhui hna hi French Catholic Church chuan kum 2018-a phalna a lo pek tawh a ni.
Kum hnih leh a chanve an chhui chhungin court, police leh Church thil chhinchhiah an en bakah a tuartu leh thil thleng hmutute an kawm.
Commission hian a titu mi 2,900 atanga 3,200 vel an hre thei a, hei hi puithiam leh rawngbawltu mi 1,15,000 zinga mi an ni a; mahse, hei hi rin dan deuh thuak chauh a la ni.
Phek 2,500 dawna chhah report-ah chuan an khawih tam ber hi mipa naupang, rawlthar chhuak hlim leh a aia naupang an ni.
Chhuitute chuan an khawi zinga 60% vel chuan an nun kawng zelah harsatna neiin mipat hmeichhiatna thilah phei chuan an buai zual phah niin an sawi.
Chhuitute chuan Church kalphung leh tih dan, puithiam hmaa inpuan dan thlenga tihdanglam an rawt.
French Church hian a hmain hetianga rawngbawltuten an lo khawih tawhte hi suma puih an lo tiam tawh a, hei hi nakum atanga an tan tur a ni.
Kumin kum tirah khan Pope Francis chuan Roman Catholic Church-in dan an neih chu thlakin mipat hmeichhiatna lama pawikhawihte chu hremna na zawk pek theihna a pawm a, hei hi kum 40 dawn chhunga dan tihdanglam lian ber a ni.