Nuclear tha chakna hmang, India-in tuihnuailawng a neih hmasak ber, INS Arihant chu hman tan a ni ta a. Nimin khan prime minister Narendra Modi chuan he tuihnuailawng hi a patrol tan tawh tih a puang a, India chu khawmual, tuipui leh boruak atanga missile kap chhuak thei ram 3-na a ni ta.
Nuclear ballistic missile submarine puitlin a ni thei ta chu a lawm thu sawiin Prime Minister Modi chuan, “INS Arihant puitlin a nih theih nana thawktu zawng zawngte ka lawmpui a, he thil hi kan ram chanchinah hriat reng a ni tawh ang,” a ti.
Tonne 6,000-a rit, INS Arihant hi kum 30 chhung vel mi thiamte duan a ni a, an hna thawk hi PM Modi kaihhruai, Nuclear Command Authority chuan a vil reng a. Tuna peiha a patrol theih tak avang hian India chu tuihnuai lamah pawh ballistic missile hmang thei a ni ta a ni.
He ballistic missile submarine hian tuihnuai atangin khawpui pawh a kap thei dawn a, tuihnuaia a awm laiin rei tak chu hmelmaten an hmuh theih loh turin a awm thei a. Hmelmate vaukam hnaih takah pawh a awm thei a, hei hi hnai tak atanga hmelmate kah theihna ralthuam (short-range missile) hmanga kahna hun remchang tur a ni ang.
INS Arihant a awm tak avang hian India chu khawmual, tui leh boruak atanga nuclear kap chhuak thei ram a ni ve ta tihna a ni bawk a. Hetianga hmun thum atanga nuclear kap chhuak thei hi US leh Russia chiah an la awm a. China hian kum 2015 khan hetiang kap chhuak thei tuihnuailawng hi a nei niin report awm mah se finfiahna a la awm lo thung a ni.
Defence Minister Rajnath Singh leh union minister dang dangte pawhin Indian Navy chu INS Arihant a neih thar tak avanga an lawmpui thu Twitter-ah an tar lang hlawm a ni.
India-in ama kutkawiha tuihnuailawng a siam hmasak ber hi Russian Akula-1 class submarine entawna siam a ni a. Kum 2009 khan Arihant tuihnuailawng hi hawn tawh a ni a, tuna mi hi a puitling hmasa ber a ni
INS Arihant-a thawktu (crew) 100-te chu Russian specialist-ten an zirtir vek tawh a. Bhabha Atomic Research Centre-a Indian scientist-ten a len zawng titê-in teh kual (diameter)-in metre 10 a ni.
India hian Russia siam nuclear chakna hmang submarine pakhat, INS Chakra a nei mek a, hei hi kum 2012 atanga 10 chhung atana Russia hnen atanga a hawh a ni.
India-in INS Arihant a neih ve tak avang hian tuihnuai, khawmual leh boruak atang nuclear missile a kap thei tawh dawn a. US leh Russia dawta hmun thun atanga nuclear missile kap thei a ni ang.