Indian thuneitute chuan ruah bawhawk sur avanga hmarchhak state, Sikkim-a chin hriat lohva la awm mi 102-te zawn hna chu ngawrh takin an thawk mek a, an zinga 22 hi sipai niin hun a liam chak hle.
Himalaya tlangdunga awm dil tui insah avanga nasa taka tui lianah hian mi 14 an thi tih chian a ni tawh.
Thuneitute chuan state chhung hmun hrang hrangah khualzin mi 3,000 an tangkhang tel mek tih an sawi.
State chhung hmun hrang hrangah hian chhanchhuah leh mi zawn hna thawk tur mi za telten hna an thawk mek.
Prime Minister Narendra Modi pawhin Chief Minister Prem Singh Tamang chu Nilaini khan biain puih an ngaihna apianga puih a inhuam thu a hrilh.
Lhonak dil hi ruah nasa taka a sur hnuah Nilaini zan khan a luang liam a. A hnuaia Lachen Valley-a Teesta luipui chu a tilian ta chiam a ni.
A bul hnaia tuikhuah atanga tui a lian veleh hnuah tui lian hi a nasa lehzual a. Defence thupuangtu chuan vawi leh khatah tui chim chin chu feet 15-20 velin a sang dawrh niin a sawi.
State thuneitu pakhat chuan tuikhuaha lei verh chhung mi 14 vel an tang niin a sawi bawk.
India-a space agency, Isro chuan thlalem atanga dil lan dan inthlak dan thlalak a tichhuak a. September 28 kha chuan dil hi hectare 167.4 vela zau tuiin a khuh laiin October 4-ah kha chuan hectare 60.3 chauh a ni tawh.
Indian Army chuan nasa takin chin hriat lohte zawn leh chhanchhuah hna an thawk a. Thuneitute chuan Nilaini zan khan sipai pakhat chu chhanchhuah a ni tih an sawi a, a dinhmun pawh a tha tih an sawi.
Chhanchhuaktute hian Teesta luiin hnawl a dah khawmna zawl, Singtam-ah ruang pawh an hai chhuak nual tawh a, an zingah hian naupang pawh a tel tih thuneitute chuan PTI news agency an hrilh.
Army chuan, “Mi zawn hna hi ruah sur leh tui la tam tak karah thawh a ni a, Teesta River hian hmun tam takah lei leh kawng a la bawk,” an ti.
Sikkim Chief Secretary VB Pathak chuan tui lian hian in leh lo tam tak a tichhia a, kawngpui leh lei tam tak a a tichhe bawk tih a sawi.
An state hmar lamah chuan mobile phone pawh a hman theih rih loh bawk.
Army chuan an chhungte chin la hre lote tan helpline pathum an siam a, pakhat chu sipai bo chhungte tana an tih a ni.
“Chhungte chin la hre loten biakpawh theih a ni a, thu thar a awm veleh hriattir zel an ni ang,” an ti.
Sikkim thenawm, West Bengal hmar lam pawh Teesta lui lian hian tibuai phakin Darjeeling, Kalimpong, Cooch Behar leh Jalpaiguri disrict-ah hartsatna an tawk.
West Bengal Chief Minister Mamata Banerjee chuan Nilaini khan mi 10,000 vel chhanchhuah an nih thu leh relief camp 190-ah awmtir an nih thu a sawi.
Sikkim hi Himalaya tlangdunga awm niin tui lian leh khuarel chhiatna dang thlen tamna a ni a. Nikum pawh khan tui lian nasa tak tuarin mi sang tam takin in leh lo an chân a, mi 24 vel an thi bawk.