Aizawl: Larsap Dr. Haribabu Kambhampati chuan nimin khan Mizoram Information Commissioner leh Lok Ayukta member ruat tharte chu thu tiamtirin a la lut.
Larsapin a lak luhte hi Mizoram State Information Commission-a Chief Information Commissioner ni turin John Neihlaia, IPS (Retd.); Information Commissioner ni turin Mangjangam Touthang, IIS (Retd.) leh Lok Ayukta member ni turin Lalsanglura, MPS (Retd.) te an ni.
Raj Bhawan Durbar Hall-a lak luh inkhawmah Chief Secretary Dr. Renu Sharma chuan ruatna lehkha, Mizoram sorkarin a tihchhuahte a hrang theuha a chhiarchhuah hnuin larsap chuan oath of office tiamtir zelin a la lut a ni.
Swearing-in-Ceremony-ah hian Lalsanglura chu member, Lok Ayukta atan lakluh hmasak niin a dawtah John Neihlaia chu Chief Information Commissioner atan lakluh a ni leh a. A hnuhnung berah Mangjangam Touthang chu Information Commissioner atan lak luh a ni.