Newcastle United in duhthusam a tha in an muala UEFA Champions League inkhel an thlen leh hmasak berah football an khel a, French champion Paris Saint-Germain chu 4-1 in an lo sawp.
Nilaini zanah Magpies hian kum 2003 March a Barcelona laka an tlawm hnua a vawikhatna atan St. James’ Park-ah Champions League football an khel a. Tyneside mipui pungkhawm thawm ropui tak leh khelmual chhunga Newcastle player-te tangrual leh tumruhna inkawp chu French team tan ven zawh a ni lo.
An superstar Kylian Mbappe hovin che hleithei lovin Eddie Howe-a pawlten hnehna pawimawh tak an chang.
Inkhel tan atangin ‘Toon Army’ thawm a ring. Minute 17-naah Miguel Almiron-a’n an goal hmahruai a khung chiah phei chu a ring lehzual.
PSG keeper Gianluigi Donnarumma tan zan duhawm lo a ni a, Alexander Isak ball pek a man theih loh avangin goal hmasa a chhuah a. Halftime hma in Dan Burn-a goal khung tur goalline a pelh hma in a man hman lo leh bawk.
Second half tan hnu lawkah Sean Longstaff-a goal khung tur dang turin a insiamrem rang tawk lo leh a. PSG tan minute 56-naah Lucas Hernandez chuan goal khat tauh lut mahse Swiss centre-back Fabian Schar chuan khelmual chhunga che tha zawk Newcastle United goal hnuhnung ber huntawp dawnah mawi zetin a khung.
Group F inkhel tan zana AC Milan nena inhnehtawk Newcastle United hi an group-ah an sang ber mek.
Eddie Howe chuan, “Kan result-ah kan lawm hle a, player te inpekna a ropui tak zet.”
“Inkhel hmasa ang nilovin tun tum chu a danglam. Keini lamin hneh taka chuhbuai a, hnaihchilh tlat kan tum a, anni lamin kan nawr tumdan kha pumpelh min tum. Kan tumah kan hlawhtling zawk tum a awm nual a, kha vang khan goal kan khung a ni.” tiin a sawi.
City chak hram
Champion lai Manchester City in huntawp dawnah substitute Julian Alvarez leh Jeremy Doku te goal khung hmangin hnehna an chang a. Tunhnaiah a zawna vawi hnih an tlawm hnuah tho lehin RB Leipzig lakah hnehna an chang.
Carabao Cup leh Premier League a tlawm zawn City tan Phil Foden chuan first half-ah goal hmahruai a khung a. Hei hi second half tan hnu lawkah Lois Openda chuan a sut a. Erling Haaland-a’n City tan huntha a hloh nual hnuah a tawpah erawh goal an khung thei ta tho a ni.
Pep Guardiola chuan, “Kan result-ah ka team hi ka teh dawn lo, kan hma a inkhel pahnih kha result tha a ni lova, mahse player 10 in goal an ven tlat chuan a awlsam bik lo.” tiin a sawi.