- Ruata
India ramah hian kan lo sawi fo tawh angin SUV ho hi tunhnaiah hralh a kal em em a. Mizoramah ngei pawh leitu an tam viau a. Tun tumah hian thla hmasa, September thla chhunga SUV hralh tam company 5 te dinhmun kan thlirho dawn a ni.
SUV tih hi Sports Utility Vehicle tihna a ni mai a. SUV rau rauah hian a te ber micro SUV kan tih a awm a, hetah hian Tata Punch te, Hyundai Exter leh adangte a awm a. A dawtah hian sub-4 meter/compact SUV kan tih ho a awm leh a, hemi hnuaiah hian Hyundai Venue te, Tata Nexon te, Kia Sonet te, Maruti Suzuki Brezza leh adangte a awm leh a. A dawtah hian midsize SUV ho awmin Maruti Suzuki Grand Vitara te, Hyundai Creta te, Kia Seltos leh adangte a awm leh a ni.
Heng bakah hian a aia lian ho leh lifestyle offroader ho a awm leh bawk a, hetah hian Toyota Fortuner te, Mahindra Thar leh Maruti Suzuki Jimny te awmin SUV puitling tia chhal, khawvel huapa a lar ho chu Toyota, Landrover, Mitsubishi, Jeep leh company dang tam tak siam te a awm bawk a ni.
Thla hmasa, September-ah khan India automotive industry hnuaiah hian passenger vehicle nuai 3.62 dawn hralhchhuah a ni a. Nikum September thla nena khaikhin chuan a punna hi zaa 2 a ni a, thla hmasa nena khaikhin chuan a punna hi zaa 0.7 a ni bawk a. India rama kutpui hrang hrang lo thleng chho turah hian lirthei tam lehzual hralhchhuah a nih beisei a ni a. Heng lirthei hralh tam tak zingah hian SUV a tam viau a ni.
SUV mai bakah passenger vehicle hralh tam zual company te
Maruti Suzuki hian an lirthei hrang hrang an hralhchhuah zat hi lirthei 1,50,812 a ni a. Nikum September thla khan lirthei 1,48,380 an hralhchhuak thung a. Heng zinga an hralh tam tak zinga mi hi SUV huanga an lirthei lei hlawh tak tak Brezza, Grand Vitara, leh Jimny te a ni.
Hyundai Motor India hian thla khat chhunga lirthei an hralh tam ber tum an tawng a, lirthei 54,241 an hralhchhuak a ni. An lirthei hralh zinga tam tham tak chu SUV huang atangin Creta, Venue, leh Exter te a ni a. Heng SUV te hi tun dinhmuna India rama SUV hralh tam ber pawl a ni.
Tata Motors hian nikum September thla aiin lirthei an hralh tlem hret a, an tlakhniamna hi zaa 6.0 niin thla hmasa khan lirthei 44,810 an hralhchhuak a, nikum September thla kha chuan lirthei 47,655 an hralhchhuak a ni. An ni hian SUV tam tawk tak an hralh ve tho a ni.
Mahindra & Mahindra hian 4-na dinhmun hauhin thla hmasa khan lirthei 41,267 an hralhchhuak a. XUV700 bik hi an hralh hnem zual model a ni. Toyota Kirloskar Motor pawhin an lirthei an hralh nual a, an re-badged Maruti Suzuki model te ho hi an hralh tam zinga mi a ni bawk a. Thla hmasa khan lirthei 22,168 hralhin nikum aia an hralh zat punna hi zaa 44 lai a ni a. An ni hian Urban Cruiser bakah Hyryder chu Maruti Suzuki nena tangduna an duan niin an hralh nasa a, SUV hmingthang Fortuner siamtu an ni bawk a ni.
SUV lirthei model mala hralh tam ber chu Tata Nexon niin Maruti Suzuki Brezza in darwin Tata Punch chu pathumna a ni. Mid-size SUV category-ah chuan Hyundai Creta chu hralh tam ber a la ni zel bawk a ni