Lirthei neitu leh driver pawl panga intelkhawmna, Joint Action Committee chuan Vairengte atanga Sairang inkar kawng leh Hliappui leh Kawlkulh inkar kawng chhe lutuk chu chak zawka siam a nih theih nan October 9 zing dar 7 atangin zawh rih loh an rel.
Joint Action Committee hruaitute chuan nimin khan Aizawl Press Club-ah chanchinbu mite an kawm a, Sairang inkar kawng leh Hliappui leh Kawlkulh inkar kawng chhia chu chak zawka siam a nih theih beiseiin October 9 zing dar 7 atangin maxi cab atanga lirthei lian ber thlengin tlan loh an rel tih an puang.
JAC hruaitute chuan Mizoram ei leh bar lakluhna kawng hnukpui ber, Vairengte atanga Sairang inkar kawng leh Manipur-a cheng Zohnathlakte chakkhai phurhna, Kawlkulh leh Hliappui inkar kawngte chu motor lian rit phur tan zawh a hrehawm hle tih sawiin, kawngpui hi chhe vek lo mah se a chhe lai erawh a chhiat hle thu te, heng kawnga an tlan hian an lirtheiten a tuar nasa a, siam a ngai nghal zel tih te an sawi.
Kawng chhe chungchang hi chief minister sawipui turin appointment an dil thin thu JAC hruaitute chuan sawiin, “CM kan hmuh theih loh takah chuan hun tiam siamin hma la rang tur leh hmalakna a awm loh chuan kan lirthei tlantir tawh rih lo kan tum thute kan thlen,” an ti a; CM hnena an lehkha thehluh chungchangah hian an duh anga hmalakna tha a awm loh avangin kawng chhiate chu sorkarin chak zawka an siam theih nan heng kawngte hi zawh rih loh an rel ta tih an sawi a ni.
An tlan loh tur chhan chu lungawi lohna lantir emaw, mipui harsatna siam tum emaw vanga tlan loh tum an ni lo a, chak zawka kawng siam an duh vang a nih thu sawiin, “Kawng hi kan zawh reng chuan siam chak a har thei a, kan tlan loh chuan hnathawh a chak kan beisei a, Mizoram chhunga mite chauh lo, state dang lirthei liante pawh he kawng hi zawh rih lo turin ngen kan tum,” an ti.
JAC-ah Mizoram truck Owners’ Association, Mizoram Truck Drivers’ Association, Mizoram Tipper Owners’ & Drivers Association, Mizoram Oil Tanker Driver Association leh Kolasib District Drivers’ Welfare Joint Action Committee te an tel a, press conference hi MTOA President B Lalzarzova’n a kaihruai a ni.