ZPM Thalai hruaituten nimin khan Aizawl Press Club-ah thu thar thehdarhtute an kawm a, MNF sorkar chu MLA inthlan lo awm tur atana central sorkar atanga SASCI sum a puk hmanga campaign leh vote zawng mekah an puh.
ZPM Thalai Vice President Zoramchhana Sailo chuan MNF sorkar chu ram hmasawnna aiin election model code of conduct-in a phuar hmaa SASCI sum puk hman a nih theihna turin beihpui a thlak mek nia sawiin, “Heng hnate hi inthlan puan hunah pawh hna kal mek ang a awm thei turin inthlan puan hmain hna hi pek chhuah rum rum a ni a, inthlan puan hmaa bawngthuthlawha lo cheh hman hrim hrim an tum a ni,” a ti.
Zoramchhana Sailo sawi danin August 29, 2023 khan restricted tender hmangin PWD hnuaiah SASCI hna 25, Rs vbch 82.7 man approve a ni a. September 5, 2023 khan PWD hnuaiah vek, restricted tender hmang vekin hna pali, Rs vbch 11.56 approve a ni bawk a. Hei bakah, September 8, 2023 khan PWD hnuaiah vek hna 77, Rs vbch 296.41 man approve-in, a vaiin hna 106, Rs vbch 390.67 a ni.
“SASCI hi hmasawnna ruhrel tha leh rotling siamna tur atan leh nakkina sum siam chhuak thei tur hmasawnna din a nihna tura central sorkarin a ruahman a nih laia duhsak zawng sum insiamna leh vote zawnna ang hrima MNF sorkarin a hmang hi pawi kan ti hle,” Zoramchhana Sailo hian a ti.
ZPM Thalai chuan SASCI hmanga hnathawkte chu nasa leh zualin an vil dawn thu leh hnathawh tha lo leh kalphung dik lo a awm a nih phawt chuan a mawhphurtuten rorelna dik tak an chan theihna turin a tawp thlengin hma a la zel dawn niin a sawi bawk.