Assam-a India leh Bangladesh inrina kaltlanga dan phal lohva thiltih thih ven nan ramri-ah hian IPC Section CrPC 144 puan mek a ni.
Bangladesh atanga Cachar-a thil tha hrang hrang lut thin a awm nia hriat a ni a, hei vang hian district thuneitute chuan ramri atanga km 1 huam chinah Section 144 CrPC hi puan a ni.
District Magistrate Keerthi Jalli chuan Section 144 hman a nih thu hi Thawhlehni khan puangin Bangladesh atanga Cachar-a sorkar phal loh thil lut tur venna a nih thu a sawi.
Jalli chuan thu an dawn atangin dan phal loh thil hi Cachar-ah a lut thin a, heng zingah hian ruihhlo leh ranvulhte pawh a tel niin an hria tih a sawi a. Hei bakah hian mihring pawhin a rukin ramri an kân thin niin a sawi.
Jalli chuan, “Heng thil tha lo hi kan palzam chuan buaina thlentu a ni a, rang taka kan vena kan chet hian thil tha lo thleng thei tam tak kan veng thei a ni,” tiin a sawi.
Phal loh zingah hian ni tlak atanga ni chhuah leh thleng ramri atanga km 1 biala mihring chet vel phal lohte a tel a. India huam chin Surma luia mihring chet pawh phal a ni lo bawk.
Surma luiah hian sangha manna lawngleng nen pawh chhuah phal a ni lo va. Sangha man thei chu Circle Officer, Katigorah-in phalna a pek, tual chhung mi, mahni ei tur mante chauh an ni ang.
“Phalna hi District Magistrate, Cachar leh Commandant, Ist Bn. BSF, Dholcherra te pawhin an pe thei ang,” tiin thupekah hian tar lan a ni.