Aizawl : Chief Electoral Office, Mizoram hnuaia Media Cell chu Addl CEO H. Lianzela kaihhruaiin a Office Chamber, MINECO ah an thukhawm.
H. Lianzela chuan election puan a nih veleh tul angte bawhzui thuai a ngaih dawn avangin lo inhmakhua lawk vek a tul thu a sawi a. Inthlanna felfai tak neih a nih theih nan election kaihhnawih mipuite hriat tulte media hrang hrang kaltlanga puan chhuah zung zung a pawimawh thu a sawi bawk.
He hunah hian inthlan puan a nih veleha Media Cell anga chet lak dan tur hrang hrangte sawiho a ni a. ECI in election a puan hnuah Press Conference koh nghal thuai a ngaih dawn thu leh hemi tura inpuahchah lawk tulte an sawi ho bakah, mawhphurhna hrang hrangte siam a ni a. Vote tla a that theih nan SVEEP awareness campaign kalpui kawnga pawimawhte pawh an sawiho bawk.