Kan ei tur lakna kawngpui ber Silchar kawng chu a chhiat tawh lutuk avangin bungraw phur motor liante chuan thawhtanni atangin tlan loh an rel ta rup mai. Mipui tawthna hi chu sawi ngai lova chiang a ni a. Lirthei neitute leh a enkawltute pawh hi an khawngaihthlak a. An eizawnna ber bungraw phurh chu kawng a chhiat em avangin an tawp lailawk a han ngai a. Engatinge heti tak maia kan chaw lakna kawng hi enkawl loh avanga a lo chhiat leh tak mai le.
Mipui eitur lakna kawngpui ber chhiaah hian tunge kan dem dawn? Khawi laiah emaw hi chuan dik lo a awm a ni. Han sawifiah se state sawrkar chuan highway lam NHIDC thuneitute an puh leh ngei ang. Helai kawng hi May thla vel khan MJA, kolasib chuan he kan dinhmun tur hi an lo vei tawh a. Thla reiloteah a manganthlak leh dawn ani tih pawh vawi tam tak sawrkarah an lo thlen tawh a. Fur a lo thleng a. Kawng a chhe chho tan a. News ah vawi tam an tarlang tawh. Mahse, a mawhphurtute chuan a khuar zual tlem tlem an hnawh zeuh zeuh a. Tih tak taka hmalakna engmah hmuh tur a awm zui chuan lova. Chumi hnuah lirthei neitute leh motor enkawlruten sawrkarah vawi tam an thlen a. Mahse awmzia a nei chuang lova. Tun hi kan thleng ta a ni.
State sawrkar hian tih tak takin a ngaihsak lova. Contractor te an vil lova. Contractor te chu hlawkna duha hnathawk an ni a. An tan kawngpui tha leh tlan nuam tak neih reng ai chuan pawisa tam tak an hmuh theihna bak an vei ngai lo a. Hetiang hi an nih avangin ram neitu sawrkar chuan mipui tan kawngtha a awm reng theih nan an contracttor te an vil tur a ni a. Kawng a chhiata contracttor puh leh ringawt thin hi a dik lova. A neitu mawhphurhna a ni. State sawrkarin kawngtha a awm theih nan contractor hi an vil reng ang a, a chhe lai a awm chuan an siam tir nghal tur anih lai hian kan sawrkat hian a tih tur a ti lo a ni. Mahni tih tur ti lo a midang puh tur zawng chi chu state enkawl tlak ani lovang.
Kan sawrkar chak tak kan ti reng a. Khawilaiah hian nge chak tak anihna chu. Kawngchhiat avanga ram pum eitur lakna kawng a pin hial lai hian SAWRKAR CHAK TAK hi kan la ti ngam em. Silchar kawng chang nilo kawng dang, heng Tlabung kawng, Chawngte kawng te hi a chhiatna a rei tawh a. State sawrkar chuan a sawifiah chuang lova. Thil thaah sawrkar chak tia kan in fak suh anih chuan a chhiaah pawh kan inrawlh ngam tur ani ang. Harsatna a tlanchhia a ngawihchuh mai lo hian sawrkar cguan aw han nei thuai sela. Kawng hi a rang lama an siam that loh chuan kan hma lawka inthlan lo awm turah hian chak tak inti rengin an chak lo dawn ani tih hi hre chiang hram teh se.