Liverpool in UEFA Europa League-ah hnehna an chang a, Union Saint-Gilloise lakah goal hnih an khung.
Ningani zanah Anfield-ah Liverpool in Belgian club hi an mikhual a. Nipui laka lakluh Dutch midfielder Ryan Gravenberch chuan a club thar tana a goal hmasa ber khungin second half tawp dawnah Diogo Jota chuan goal dang a khung.
- Vawi hnihah vawi hnih
Tun season-ah Europa League an khel a, nipui laiin an squad an inthuamtha bawk nen, tualchhung football lamah season bul an tan dan thlirin Liverpool hi Europa League-ah champion tura rinkai ber zing ami an ni.
An mualah inkhelah erawh ball thunun zawk mahse chance hlauhawm a tam lo.
Striker Darwin Nunez chuan Mohamed Salah cross tha zet chu goal sirah bak a thai thei lova, lehlamah Gustaf Nilsson chuan goal hma zawn chiah atangin goal chungah a tauh.
Halftime dawnah Trent Alexander-Arnold ball pet tha chu Anthony Moris chuan a dansak a, a dan per hi Gravenberch-a’n goal-ah a khung.
Dutch midfielder hian second half-ah goal khung belhna remchang nei mahse Moris-a’n a dansak.
Belgian team in inkhel tawp lamah na zawkin goal nawr mahse Liverpool in remchang an la a, Diogo Jota chuan an goal hnihna huntawp dawnah counter-attack rang tak atangin a khung.
Group E-ah point ruk hmu in hma an hruai mek a. An manager Jurgen Klopp chuan, “Kan tum kan hlen. Football hmuhnawm tak khel chungin a chak reng theih loh a, chak tur chuan a tul ang apiang kan tih a ngai thin. Kan tan hetianga harsa taka hnehna chan te hi a tha ve thova, hetiang inkhel atang hian zir tur tha a awm thin.” tiin a sawi a.
“Ball awmze nei a kan inpek kual a, kan football a kaltluan chuan team hlauhawm kan ni a, hetiang kan tih theih loh chuan team danglam hlak kan ni. Player ngai vek tho si in hetiang hi a thleng leh thin. Chuvangin kan zir tur a tam a, kan hmang tangkai ang.” a ti bawk.
- Brighton in point hmu
Premier League club Brighton & Hove Albion in Europe huap football inelnaah a vawikhatna atan point an hmu a, Olympique Marseille nen inkhelin 2-2 in an inhnehtawk.
Stade Vélodrome-ah Marseille hian Seagulls hi an mikhual a. Aston Villa laka 6-1 a tlawm hlim Brighton in result tha neih nghal an duh. An tum ang erawhin bul an tan lo.
Marseille in first half-ah minute hnih chhungin goal hnih an khung a. Minute 19-naah defender Chancel Mbemba chuan an goal hmahruai a khung a. A hnu lawkah Brighton captain Lewis Dunk chetsual zarah Jordan Veretout chuan an goal hnihna a khung ve bawk.
Brighton hian first half-ah penalty an hmu niin a lang hman a, mahse video assistant referee hman niin thutlukna sut a ni.
Second half-ah Brighton in beiseina insiam turin an mamawh goal a khung nghal thuai a, hei hian inkhel a nghawng thui.
Kaoru Mitoma ball pawhlet chu Pascal Gross chuan a khung a. Minute 88-naah penalty hmu zuiin Joao Pedro chuan an si phurh sutna ni turin goal-ah a khung.
Brighton manager Roberto de Zerbi chuan, “Vawiin kan inkhelh danah ka player te ka chhuang hle a, kan kheltha. Villa Park-ah 6-1 a kan tlawm hnuah first half-ah goal an khung nawn hma nen khan buai phah vek thei kan ni a, mahse kan thawhleh dan khan min ti lawm a ni.”
“Huaisenna leh beidawng lova inkhelh theih hi a pawimawh hle.” a ti.
- Hammers an kal zel
Group A lamah West Ham United in Europa League-ah duhthusam a bul an tan chu an chhunzawm a, Freiburg lakah 2-1 in an chak.
Hammers in first half thunun viau in Lucas Paqueta hmangin goal an khung a. Mahse second half tan hnu lawkah Roland Sallai chuan Freiburg tan a sut.
Defender Nayef Aguerd chuan minute 66-naah James Ward-Prowse corner tauh lutin chakna goal a khung a ni.
West Ham hi Europe huap inelna a a zawna match 17 tlawm lova kal zawn thei hmasa ber an ni a. Manchester City, Leeds United leh Tottenham te record an khum.