Aizawl : Rural Development Minister Lalruatkima’n nimin khan NINECO-a a office chamber atangin Online Mode-in Tipa RD Block, BDO Office sak thar leh District Rural Development Organization (DRDO) Project Director Siaha leh Khawzawl te chenna tur quarter sak thar te a hawng.
Hawnna puala inkhawmah Lalruatkima chuan, Pathian hruaina leh malsawmna changa kum nga chhungin RD Department hmalakna enin, an hlawhtlinna leh mipui rawngbawl kawnga an hnathawhteah a lungawithlak nia a hriat thu a sawi a. Hengte hi thawktute thahnemngaihna leh inpekna avangte leh mipui thlawpna bakah tawiawmna an dawn that vang chauh a nih thu a sawi.
Lalruatkima chuan, state hrang hrang RD Department te hnathawh tehna pakhata RD Department Mizoram chuan dinhmun pahnihna a luah tih a sawi a. Ministry lamin thlir letna meeting an koha state dangte an hauh laiin, Mizoram chuan fak a hlawh a, MGNREGS hlawhtlinnate a hmuna zir turin Puducherry RD Minister hialin an hma lakna a rawn en niin a sawi.
He hun hi RD Department-a Commissioner & Secretary, Zarzosanga’n a kaihruai a ni.
BDO Office, Tipa RD Bloch hi concrete building chawng thuma sak niin, a sak nan cheng nuai 182.94 lakhs sen a ni a. PD Quarter, Siaha pawh hi concrete building chawng thuma sak a ni a, a sak nan cheng nuai 142.30 lakhs sen a ni. PD Quarter Khawzawl pawh concrete building chawng li-a sak niin, a sak nan cheng nuai 157 sen a ni.