Aizawl: Palak bial mipuiten opposition bial nih an duh tawh loh avangin sorkarna chang leh ngei tur MNF chu zawm lo thei lo a nih thu KT Rokhaw chuan a sawi.
Tun hnaia Palak bialtu MLA atanga bânga MNF party zawma MLA inthlanpui lo awm tura Palak biala MNF candidate atana ruat, KT Rokhaw chuan nimin khan Mizo Hnam Rûn chhung inkhawmah thu a sawi a. Opposition MLA ni chunga kum 15 an aupui chu MNF party mi a nih hnu ni hnih/khat lek chhungin health department leh school education department-ah hlawhtlinna a hmu nghal tih a sawi.
Hun kal tawh thlirin, hruaitu tha leh huaisen tan lo chuan ram hi hruai theih a ni lo tih sawiin KT Rokhaw chuan, “Hun khirh leh harsa tak tak he sorkarin tha taka a hmachhawn zel hi a fakawm hlein ka hria. Ramri buai chungchangah silai hmet puak ngam, raltlan thawnlet tur leh bio-metrics la tura central sorkarin a tih pawh hnial ngam sorkar hi a fakawm tak zet,” tia sawiin, Zohnahthlakte thlamuanpui ber chu Pathian a ni a, chumi dawtah chuan MNF president, Chief Minister Zoramthang leh a kaihhruai sorkar a nih thu a sawi.
KT Rokhaw chuan, “Chhim lam atangin MNF boruak a êng zel dawn a. MNF party hi Pathian duhzawng anga rorel tlat an nih avangin a sorkar leh ngei ang,” a ti bawk.