Venhim hnathawktuten an mi man duh tak, Kashmiri firfiak, Zakir Musa chu tun lai hian Punjab-a Bathinda leh Ferozepur district-ah a biru niin an hria a, venhimna leh amah man tuma beihna ngawrh lehzualin an kalpui.
Intelligence report-ah Musa hi Sikh anga awmin an lu tuamnain a intuam niin an tar lang a. Amah hi Ansar Ghazwat-ul-Hind pawla an hotu niin khawvel huap firfiak pawl peng an ni.
Sipai, Punjab Police leh para-military-ten hmun pawimawh -Bathinda railway station leh hmun dangte nasa takin an dap a ni.
Security agency-te chuan district hnihah hian a lem chuanna poster an thehdarh a, thlalak pakhatah Sikh anga a lanna an dah bawk.
Musa chuanna poster hi a hma pawhin Gurdaspur leh Amritsar district-ah thehdarh a lo ni tawh a, tuna mi ang bawk hian Punjab-ah a biru niin an lo hre tawh a ni.
Punjab Police thuneitu sangte chuan an state chhungah inralrinna an khawng ri tawh a. Tun hnai lawkah khan Punjab leh Jammu & Kashmir Police chuan Punjab-ah hian a thuihhruai nia hriatte an man a, an zingah hian engineering student-te pawh an awm a ni.