Mizoram State Rural Livelihoods Mission (MzSRLM)-in Self Help Group-ten an thil siam pho chhuahna leh zawrhna hmun, SHG Mart Lianchhiari Rûn Building Ground Floor (Horticulture Department bul)-a buatsaih chu nimin khan Rural Development Minister Lalruatkima’n a hawng.
Lalruatkima chuan MzSRLM chu kum 10 chauhva upa ni mah se, thingtlang mite dinhmun chawikanna kawngah leh an tan eizawnna kawng kawhhmuh leh siamsak kawngah te SHG kaltlanga nasa tak an thawhna chuan rah duhawm tak a chhuah mek nia sawiin, “Hei hian Mizoram kan ei leh bar dinhmun leh kuthathawktute leh kuthemthiamte sum lakluh a tipung a ni,” a ti.
RD minister chuan MzSRLM hian eizawnna kawng lamah chauh thingtlang a chengte hi hma kalpui lovin, sum leh pai enkawl leh vawn te an zirtir bawk a, hei hian nasa takin anmahniah chona siamin ngaihtuah thar a pe a, chu chuan an mahni a tumruhna leh taimakna te tuhin an hlawhtling ta tih a sawi.
SHG te thil siam chu quality tha leh belchian dawl a nih a pawimawh thu sawiin, an thil siam reng rengah hei hi ngaipawimawh leh rilru a dah reng turin a chah bawk.
SHG Mart hawnna inkhawm hi Zarzosanga, IAS, Secretary, RD Department-in kaihruai a ni.
Mizoram pumah hian Self Help Group 10,708 an awm mek a, heng member zat hi mi 84,169 an awm mek a. An chungah hian an mahni khaikhawmtu, Village Organization 735 leh Cluster Level Federation 52 a awm mek bawk.