Tlangzarh hun tur dik tak chu karleh zirtawpni daih ni mah se, Taylor Swift ‘Eras Tour’ concert film chu box office blockbuster a nghal ringawt tawh.
Film distributor AMC hian cinema hall-a chhuah hun tur karkhat hmalamh advance ticket sales $Maktaduai 1000 chuang a dawng dim diam tawh a, ticket lei theih a nih thu puan atanga reilote-ah a mak a mak atamin advance-in an lei nghal duak duak mai a ni.
Nikhat thil thu-a movie ticket hralh hnem ber record an siam nia sawiin AMC hian an thil tawn chu mumang a ang hial a, heti taka an hralh chak dan em em hi hahipin an sawi nasa mai.
Taylor Swift global tour hi kumthar 2024 tawp lam thleng a huam dawn a, heti hi a nih chuan rimawi khavela tour ropui ber leh sum lalut hnem ber ni thei turin a dinhmun a tha nghal hle.
Elton John-a’n farewell tour a neih atanga $Billion 1.4 a lakluh chu Taylor Swift hian a khum hneh hle tura ngaih a, engzat a tamin nge a khum dawn a, record ropui tak a siam ang tih chu an inrinsiak luai luai tawh a ni.