AC Milan in huntawp dawn lamah Christian Pulisic hmangin goal an khung a, an striker Olivier Giroud chu goal veng tura mamawh bawk chungin Genoa lakah 1-0 in an chak.
Inrinni zana Stadio Luigi Ferraris a inkhel tawp lamah thil thleng a tam a. Team pahnihten an goalkeeper te red card avangin an chan ve ve a. Mikhual team tan huntawp dawnah Giroud-a’n goal a veng.
United States star Pulisic-a’n minute 87-naah ram tana a khelhpui Yunus Musah chuan ball tha a siamsak atangin maiw tak maiin a hlap lut a. Tun season-ah Chelsea atanga Milan a pan hnuah Serie A-ah goal li a khung tawh.
Milan tan hnehna sual chhuah erawh a awlsam lo. An goalkeeper Mike Maignan chu huntawp dawn hun pekbelhah Caleb Ekuban a foul avangin hnawhchhuah a ni a. Substitute siam theih an siam zawh vek tawh avangin Giroud-a’n goal a ven a ngai.
French striker hian George Puscas goal khungna remchang tur a dansak a. Albert Gudmundsson chuan freekick atangin goal bar a pet per bawk.
Giroud chuan, “Hetiang ang hun hi ka tawn ka ring ngai lo, goal ven chu a boruak a dang hle. Mahse huntawp dawna goal khung tur lo dan kha a pawimawh.”
“Kan squad-ah a lian ber pawl ka ni a, chuvangin goal ven kha ka thlang. Naupanlai pawhin goal ka veng thin a, mahse tunah chuan a danglam hle. Save ka siam kha goal khung ang maiah ka inngai.” tiin a sawi.
Inkhel dangah Turin derby-ah Juventus in 2-0 in Torino an hneh a. Second half-ah Frederico Gatti leh Arkadiusz Milik te hmangin goal an khung.
Juve hi Serie A bikah Torino lakah hian match 17 chhung an tlawm tawh lo.
Inter Milan nin point an hloh leh a, San Siro-ah Francesco Acerbi leh Lautaro Martinez te kaltlangin goal hnih khung hma mahse Riccardo Orsolini leh Joshua Zirkzee ten Bologna tan an sut.