Aizawl: Zoram People’s Movement (ZPM) chuan Inrinni zingkar khan ITI Veng leh Thuampuiah te street campaign an nei.
ITI bazar-a street campaign-ah Aizawl South II bialtu MLA ni lai leh he biala ZPM candidate ni bawk, Lalchhuanthanga chuan kalphung thar, mipui sorkarah chuan an ngaih pawimawh em em chu thalaite hmakhua a nih thu sawiin, “Thalaiten mahnia ei an zawn ve theihna turin hand holding policy kan nei a. Entrepreneurship tha leh changtlung an awm theih nan hma kan la dawn a ni,” a ti.
Kut hnathawktute thlai thar leina turin budget-ah an dah dawn tih sawiin Lalchhuanthanga chuan, “Thlai thar man man zawka kan hralh theih nan nasa takin hma kan la dawn a ni. UT kan nih atangin tun thleng hian intodelhna sawi tur kan la hre lo,” tiin, Mizoram chu UT a nih atanga kum 50 a pelh hnuah pawh department pakhatmah intodelh an la neih loh avangin ZPM hi a pian a ngai ta niin a sawi.
Thuampui venga thusawitu, Aizawl East I ZPM candidate Lalthansanga (Chatea) chuan kumin MLA inthlanpui lo awm turah party dangte nasa takin hma an la a, party dangte aupui leh ZPM aupui erawh a inang lo hle tih a sawi.
Aizawl East I chu Chief Minister bial a ni a, hna pawh nasa taka thawk angin an insawi a. Heng an hnathawhte hi a lawmawm em em rualin, ZPM MLA-te pawhin an bial chhungah nasa takin hna an thawk ve tho a, chief minister bial aia an thawh nepna a awm chuang lo niin a sawi.