Congress thupuangtu Dr Lallianchhunga chuan, Mizoramah sorkar tha leh kalphung dik din a nih theihna’n Congress party chu Lalpa’n a buatsaih zel niin a sawi.
Champhai South biala Indian National Congress (INC) atanga ding tur Dr Lallianchhunga’n, Champhai South bial chhunga an party zawm tharte Inrinnia a lawm luhnaah thu a sawi a. Party dangte aia Congress party danglamna chu hruaitu atan mi dik leh rinawm, neutral mipuite pawhin an rinngam Lalsawta an nei hi a ni tiin, “Pu Lalsawta kaihhruaina hnuaiah Lalpan Congress party min thlahthlam lo va. Sorkat tha, kalphung dik din a nih theih nan Congress party hi Lalpan min buatsaih zel a ni,” a ti.
Dr Lallianchhunga chuan, party dangah pawh mi fel tak tak awm bawk mah se, an hruaitu lu ber te hruaina hnuaiah engmah an sawi ngam lo tih a sawi a. Lui pawh a hnar a fim chuan a mawnglam pawh a fim thin ang tho hi ram rorelna pawh a ni tih sawiin, “Chief Minister atan sum leh pai lama mi dik leh rinawm i tinzawn phawt ang u. MNF ten SEDP leh SASCI sum an thlamuanpui em em laiin, keini Congress chuan Lalpa kan Pathian hming kan lam zawk ang,” a ti bawk.
Congress party chu MNF party rorel dan that loh vanga sorkar tur an ni ringawt lo tih sawiin Dr Lallianchhunga chuan, “Pu Zoramthanga kaihhruai MNF sorkar aia tha leh belhchian tlak, sorkar tha din kan tumna zawk hi mipuite’n party dang te aia min thlan chhan nise kan duh ber a ni,” a ti a. Lalsawta kaihhruai Congress party a sorkar chuan Zoramthanga kaihhruai MNF sorkar aiin a tha zawk ang a, sorkar hnathawk ten a hun takah hlawh an la thei tawh ang a, healthcare hnuaia damlo bill ba ten ngaihsak an hlawh tawh ang a, mi mal contractor te hamthatna aiin mipui hamthatna an ngaipawimawh zawk dawn niin a sawi.